مذكراتي في الكويت

بسم الله الرحمن الرحيم 

السلام عليكم و رحمة الله و بركاته

انا كنت كتبت مذكراتي عن خبرة سنة في العمل بدولة الكويت كطبيب مسجل اطفال بمستشفى العرف الخاص ، كتبتها على جروب المهتمين  و في زملاء كتير طلب انها تنزل على بعضها ، لعلها تكون مفيدة للزملاء الجدد الذين يبحثون عن عمل في دولة الكويت .. طبعا هيا خواطر عامة بس ممكن تقرب صورة الكويت لاذهان الناس لاني كنت باحس ان الكويت غامضة شوية لحد ما رحتها و جربتها ..

طويلة شوية لاني كنت بانزلها على هيئة حلقات على مدار شهر .. بس باذن الله تكون مفيدة ..

طبعا بعد ما رجعت في بعض الحاجات اتغيرت لاني سافرت من ١٢ /٢٠١٣ لحد ١١/ ٢٠١٤

فحاولت اني اعمل update للمعلومات شوية ..

فلو حد من الزملاء لقى غلطة او اي معلومة فيها خلل ياريت يصححلي ، و اسال الله العظيم ان يفيد بها و اسالكم الدعاء لي بظاهر الغيب .. 

-----------------------

-----------------------

ذكريات الكويت (١) 

بداية .. و البداية دائما ما تكون من الصعوبة بمكان وبعد الصلاة و السلام على رسول الله ،،،

فأنا اخصائي أطفال دفعة ٢٠٠٥ ماجستير ٢٠١٢ .. وحاليا باكمل برنامج الزمالة المصرية في طب الاطفال سنة ثالثة من مجموع اربع سنوات في مستشفى بنها التخصصي للاطفال .. جمدت فترة الزمالة لمدة سنه وسافرت بفضل الله الى دولة (الكويت) ..

لما فكرت اسافر نصحوني ادخل على النت و ادور على مواقع زي (شغلانتي) مثلاو مواقع تانية بتهتم انها تتابع اي وظائف شاغرة للاطباء في الخليج  .. و بالفعل .. كتبت على الجوجل (وظائف اخصائي اطفال السعودية الكويت قطر الامارات عمان) اي حاجة في اي حاجه .. و لما تطلعلي اي وظيفة اقوم باعت السي في بتاعي على الشركة اللي حاطه الاعلان ..

ما طولتش كتير و لقيت شركات كتير عماله تكلمني و تعرض عليا عروض باسماء مستشفيات و اشي مستوصفات .. اشي الرياض على جده على الطايف ، نجران و جيزان ما يضرش .. شويه عمان  

و كل ما يكلمني حد ادخل على النت ادور على المكان اخباره ايه ، مايعجبنيش اروح مكلم الشركة اعتذرلها .. لحد ما كلمني الراجل بتاع الكويت .. انا اخويا اساسا في الكويت و اكبر مني بسنه طبيب مسجل كارديولوجي ، فطبعا الكويت هتبقى مفضلة بالنسبالي ، غير ان ليا حد يسال في المستشفى ذات نفسها ..

------------------------

ذكريات الكويت (٢) 

استكمالا لماسبق .. 

اتصلت بيا شركة اسمها (trust) في اسكندرية ..

دكتور احمد .. مع حضرتك ا حلمي شركة ترست باعرض عليك اوفر للعمل في الكويت مستشفى (العرف) في الجهراء .. 

سبحان الله ، انا  اخويا شغال في الجهراء .. 

نقف هنا شوية و نقول : علشان تسافر الكويت كطبيب مسجل في تخصص ما لازم يكون معاك ماستر و سنة خبرة على الاقل .. و اكتشفت بعد كده ان الكلام ده مطبق في البرايفت بس ، لكن الحكومة لو حاجة العمل تستحق او للي بيقدم دلال عند رئيس القسم بيفوتوا النقطة دي ، وممكن الحاصل على ماستر حديث يعدي .. نقطة تانية .. مش معترف في الكويت غير بشهادة الدكتوراه او الزمالة البريطانية لو عاوز تاخد درجة اعلى من الطبيب المسجل .. بعد الدكتوراه علطول بتصنف كطبيب مسجل اول senior regestrar ثم اختصاصي specialist بعد عدد سنين خبره لا اتذكرها .. بعدها اختصاصي اول ثم بروفسير اختصاصي او prof. specialist .. مؤخرا بدأوا يحطوا الزمالة المصرية في الاعتبار ، و ده بعد مارجعت بس لسه كانوا بيدرسوا هيحطوها تحت انهو مسمى .. بس عامة اخرك حسب معلوماتي prof. specialist كمغترب في الكويت ، زمان كان ممكن تكون استشاري لكن حجموا الموضوع ده دلوقتي وبقى الاستشاريين كوايته بس .. كلية الطب الوحيدة هناك حوالي ٩٠ طبيب اول مايتخرجوا وعلى حساب الحكومة بياخدوا المعادلة الكندية و يروحوا كندا ياخدوا البورد الكندي من هناك و يرجعوا استشاريين .. ماعندناش اطباء مسجلين ولا اخصائيين كوايتة ..

المهم .. اتصلت باخويا هناك اساله عن المستشفى فاكتشفت انها قدام بيته علطول ، انا كنت باعتله ورقي علشان يشوفلي شغلانه من اكتر من شهرين و اكتشفت ان ورقي ضاع و قالوله خليه يبعته تاني ..

من هنا اخدت انطباع ( واتاكدلي لما رحت هناك ) ان كتير من الموظفين الحكوميين في الكويت في غاية الاهمال و (عدم اللامبالاة) و دي سمه سائدة ، ولازم تتابع ورقك بنفسك والا قابلني بعد سنة اذا عرفت !!

الموظفين معظمهم كويتيات ، الشغل بالنسبالهم فنتازيا مش اكتر .. الحكومة بتدي راتب شهري للأم الكويتية بغض النظر عن شغلها 

وبما اني كنت طفشت من البلد بصراحة وقتها و نفسيتي كانت مش ولابد .. قلت لاخويا يساللي في المستشفى نفسها ، وصل لاحد الاستشاريين في قسم الاطفال هناك وساله عن المستشفى قاله والله هيا كويسه وصاحبها راجل محترم و منتظم في المرتب بس علميا الدنيا مش اوي يعني .. نظام برايفيت يعني .. بس خد بالك ان في امتحان لازم تعديه الاول 

امتحان ايه ده ؟؟ رد قاللي لا غالبا ده حاجة روتينيه و محدش بيسقط فيها .. هوه انت بعد ماتروح هيرجعوك ؟! مش منطقي يعني ، غير ان العقد الحكومي بتاع اخويا ماكانش فيه ايتوها امتحانات ..

المهم ان الكلام كان مشجع الى حد ما ، طبيعة الشغل استقبال طوارئ اطفال و استقبال مواليد و حضانات .. سأل كمان عن الشركة فلقى دكاترة و موظفين كمان كتير هناك جايين عن طريقها .. الاستاذ حلمي شخصية مشهورة جدا هناك ، طبعا ده طمني اكتر و اهم حاجة ان اخويا هيبقى جنبي و شتان انك تروح الغربه في مكان عارف فيه حد من مكان غريب عنك ، اقرب مثال اخويا نفسه لما راح اتسوح اكتر من شهرين على بال مابدا يظبط اموره ، وبعد الاستخاره و الاستشاره كلمت ا حلمي ورحتله مقر الشركة .. 

وراني عقد مشابه .. عقد بسيط جدا صفحة و نص بس .. لمدة سنة واحده شهر اجازة مدفوع الاجر سكن عائلي مؤثث او ٢٠٠ دينار بدل سكن تذاكر سفر للطبيب وحده .. بس اللي لفت نظري ان صاحب العمل من حقه يمشيك خلال اسبوعين في اي وقت دون ابداء الاسباب ، اما الطبيب فمن حقه تقديم استقالته قبلها بثلاث شهور .. لكن في كل الحالات مافيش شرط جزائي 

الشركة اخدت مني١٠ الاف جنيه على دفعتين ٣ قبل التاشيرة و ٧ بعد التاشيرة اللي وصلت بعد شهر تقريبا و معاها العقد موثق من هناك ، طبعا الراجل قاللي ان في هناك مقابلة شخصية (روتينية) بحته مافيهاش قلق ، واداني مع التاشيرة و العقد  ورقة بالحاجات اللي المفروض اعملها ، طبعا اتخضيت لما شفت الورقة لان فيها كمية بنود رهيبة مافهمتش منها حاجة اصلا .. قالي ماتقلقش روح بس مكتب الصحة الكويتي في المهندسين و هما هيدلوك على الخطوات واحدة واحدة .. دي ورقة استرشادية مش اكتر ..

الحقيقة ان الشركة صادقة لكني اكتشفت ٤ مشاكل تخص الشركة عرفتها بعد مارحت .. اولها ممكن اقوله دلوقتي و الباقي ياتي تباعا .. المشكلة اني لما رحت مكتب الصحة الكويتي في المهندسين قالولي انهم مسئولين عن العقود الحكومية فقط اما العقود الخاصة فدي في الدقي مركز اسمه حلول .. اخدت بعضي ورحت المركز وكانت المفاجأة ان الورقة الاسترشادية اللي معايا مطبوعة بقالها سنين و كل حاجة فيها اتغيرت !! من بنود كاملة اتغيرت لحد المبالغ المالية اللي مطلوبة .. يحضرني هنا ان الكشف الطبي كان مكتوب في الورقه انه هيتكلف ٣٥٠ جنيه و كنت واخد معايا وانا رايح الف جنيه على اساس اني واخد بزياده لقيته بقى ب ٨٥٠ جنيه !! طبعا الفلوس اللي معايا كفتني بالعافية ، والتيشيرت اللي انا لابسه اتنتش في عربية واتقطع قطعه كبيره وانا معدي و بقيت ماشي زي الشحاتين بالزبط و ماعييش اجيب اي حاجة البسها لحد مارجعت البيت !!

لا و اكلم الاستاذ حلمي بعدها اقوله الورقة طلعت فشنك اعمل ايه ؟ يقولي طب استاذنك يادكتور تكتبلي الصح و تبعتهولي على الايميل علشان الناس اللي بعديك !!

طبعا غلطة سخيفة لشركة المفروض انها بتتعامل في الحوار ده من فترة .. واكتشفت لاحقا ان زميل ليا من اسيوط دفع للشركة ٨ الاف بس و هيا خلصتله كل الاجراءات مانزلش القاهرة غير مره واحده بس بالاتفاق مع الشركة علشان الكشف الطبي و تحاليل الفيروسات في المعامل المركزية وكانوا معاه خطوة بخطوة ..

الخلاصة اني خلصت الاجراءات بعد عناء دام حوال شهر و نص تقريبا .. يعني انا وافقت على العرض في اول شهر ٩ سافرت في نص ١٢ في الاخر

حجزت تذكرة السفر ، الشركة قالتلي احجز على الدرجة السياحية على الطيران اللي انت عاوزه بس تجيب فاتورة بيه وتسترد الفلوس اول ماتوصل هناك باذن الله ..

طبعا كعادة الشعب المصري دخلت شركة السياحة و قلتلها ايه احسن طيران عندكم ؟! مش مهم الفلوس اهم حاجة الخدمة !! 

وبعد وداع الاهل و الاحباب توكلت على الله و ركبت على مصر للطيران من برج العرب .. ساعتين و نص و كانت الطائرة تحط على الاراضي الكويتية لابدا مرحلة جديدة مجهولة من حياتي 

يتبع ..

-------------------------

-–-----------------------

ذكريات الكويت (٣)

الكويت ، تلك الدولة الصغيرة اللي مساحتها لا تتجاوز مش عارف كام متر مربع ..

لما تقعد فيها شوية تعرف ان سكانها ٣ مليون مواطن منهم فقط مليون كويتي و ٢ مليون مغترب منهم حوالي ٤٥٠ الف مصري .. وده فارق كبير عن السعودية من حيث الاحساس بالغربة .. والدي طبيب اشتغل في السعودية حوالي ٢٠ سنة فكنت قضيت طفولتي كاملة في السعودية لحد الثانوية العامة ، و مما لاحظته انك في الكويت عندك مجتمع مصري لا باس به حواليك مايحسسكش بالغربة اوي زي السعودية .. 

باقي المغتربين يتراوحوا مابين الهنود و البنغال والفلبينيين و بلاد الشام  بعض الجنسيات الاخرى

.. و في الكويت عدد كبير جدا من ال (بدون) .. انا كنت فاكر بدون دي في الاول معناها (بدو) كده لكن عرفت ان معناها (بدون جنسية) ، ودول مجموعة من الناس نزحوا من اماكن اخرى و تكاثروا و توالدوا في الكويت من عشرات السنين والدولة ساعتها تغاضت عنهم لان تقريبا ماكانش في دولة من اساسه ، ولكنهم حاليا بيمثلوا مشكلة كبيرة جدا للدولة ، عاداتهم و تقاليدهم و لهجتهم كويتية الا انهم اتولدوا لقوا نفسهم كوايتة ولكن بدون حقوق المواطن الكويتي ، نظرة الكوايتة ليهم انهم اقل منهم في العرق ..

ولان تعدادهم عالي فصعب ان الدولة تديهم الجنسية لانه يترتب على ذلك التاثير الجذري على ميزانية الدولة .. و هنيجي لجزئية حقوق ومميزات المواطن الكويتي كمان شوية ..

نزلت مطار الكويت الدولي على الساعة ٨ مساءا ، هوه المطار الوحيد في الكويت .. وكأني دخلت مول كبير .. زحمة و محلات اشي كنتاكي على ماكدونالدز على كوستا كافيه ، عرفت بعد كده انه فسحة زيها زي اي فسحة .. يللا يا عيال نطلع على المطار وكده يعني

المفروض اخويا مستنيني .. انت فين يا اخويا ؟ مش لاقي اخويا في الزحمة بس لقيت واحد ماسك ورقة مطبوع عليها دكتور احمد حسان (اللي هوه انا)  .. مستشفى العرف 

انا مابعرفش في الاشكال اوي بس شكله يدي على هندي كده وانا ماباعرفش اتكلم هندي ، اعمل ايه ؟! انت فين ياعم وليد (ده اخويا طبعا) ، المهم انه طلع بنجلاديشي و بيتكلم عربي كويس ، اخدني بالحضن كاني ابن عمته اللي كان في الامارات بقاله خمستاشر سنة ولسه راجع .. ولسه بياخد الشنط اللي معايا لقيت اخويا ظهر الحمدلله .. بعد الاحضان و الذي منه عرفتهم ببعض .. واخويا اخد منه عنوان السكن واخدنا نمرة تليفون ا محمد سالم المسئول عن السكن و سبنا الراجل اللي ماشفتوش تاني الصراحة غير قبل ما ارجع بشهر كده بالصدفة .

ركبت مع اخويا عربيته وفي الطريق الى الجهراء الذي استغرق نصف ساعة فقط عرفت ميزة تانية في الكويت الا وهي مساحة البلد الصغيرة ، ده غير ان المساحة المشغولة بالسكان لا تتجاوز ٣٠ في المية من المساحة الاجمالية ، وده يخولك انك تروح ابعد مكان في الكويت بالعربية في مده لا تتجاوز الساعة و الربع مثلا لو السكة سالكة .. اي مكان سواء اي فسحة تيجي في دماغك او meeting او مؤتمر او مشوار ممكن تروحه باريحية كبيرة .. و الشيء الظريف ان المكان اللي انا رحته اللي هو الجهراء اخر مكان فيه بشر .. بعدنا ييجي ١٠٠ كيلو صحراء قبل الحدود العراقية فالناس معتبراك محدوف حدفة السنين مع انك بينك و بين العاصمة من نص ساعة الى ساعة الا تلت بالكتير ، سمعت جملة (يااااااااه ، الجهراء؟! ايه اللي حدفك الحدفة دي ؟!) عشرات المرات 

معظم المناطق مافيش بينها و بين بعض مسافات بل هي اقرب الى قطاعات .. عمري ماشفت الحدود مابين الكويت العاصمة و السالمية مثلا ، او بين حولي والجابرية ، كله سايح على كله

وصلنا الجهراء و اتعشينا سوا و بعدين وصلني المستشفى اللي كان ليها هيبة اول ما دخلتها بصراحة .. نظافة ايه و ديكورات ايه حاجة اخر ألاجه بصراحة .. نظام فنادق ٥ نجوم .. خمس ادوار ، كلمنا أ. محمد راح باعتلنا مفتاح الشقة اللي ورا المستشفى علطول مع الغفير بتاع المستشفى عم بدري .. دخلت السكن ، توقعت بصراحة انه يبقى في مستوى المستشفى  بس هوه كان متوسط ، ولكن بالنسبة لفرد واحد فقط ، غرفة واحدة و صالة ، حمام و مطبخ صغيرين ، ادوات النظافة كلها من اول الصابون والتايد لحد معجون الاسنان ، ادوات المطبخ كلها جديدة صواني حلل طاسات ، واكتر حاجة عجبتني كانت التلاجة الصراحة .. اصل انا اعز الاكل اوي .. كانت مليانة معلبات اشكال على الوان عصائر بيبسي بيض ، و الفريزر حاجة تفرح .. اذا قلتلي ايه اكتر حاجة أبهجت خلال السنة دي هاقولك اللحظة اللي فتحت فيها التلاجة 😋 

المهم ان دي ميزة كبيرة جدا في البرايفيت عن الحكومي .. انا هابقى استطرد باذن الله في الفروق مابينهم بس مبدئيا البرايفيت بياخدك عالهادي و بيأكلك زبادي في الغالب ويحتضنك زي ما الراجل البنجلاديشي احتضني في المطار كده بالزبط .. وبعدين يبتدي يلبك بقى انما العقد الحكومي بيرميك في الهو لحد مايبانلك صاحب بس بتستقر بعد اول مرتب تاخده واللي ممكن يتاخر لحد سبع شهور !!

طبعا ده في العقد الثابت اللي هوه سنتين .. انما في الفتره الاخيره لغوا العقود (الا طبعا بالواسطه او في نطاق محدود)  و بقوا بياخدوا الدكاتره (لوكم) ٣ شهور الاول يجربه و بعدين ممكن يكمل و ممكن يمشي (طبعا بالنسبة للطرفين) .. اللوكم ده طبعا (إشطه) لانك واكل شارب نايم مواصلاتك من و الى المستشفى عليهم .. فمرتبك كله بيبقى صافي ، بس طبعا انت جاي بتاشيرة زياره فمالكش حق تعمل اي حاجة محتاجة بطاقة ، و هنيجي للكلام ده بعد شوية ..

المهم ان انا طبعا كنت ميت على نفسي والساعة كانت عدت ١٢ ، فضيت الشنط كيفما اتفق و خلدت الى النوم .. ورانا يوم الله اعلم بيه بكره .. خ خ خ ... 

يتبع ..

--------------------------

--------------------------

ذكريات الكويت (٤)

عود على بدء ..

كنا وصلنا لاول يوم شغل ليا كطبيب مسجل اطفال في مستشفى العرف الخاصة بمحافظة الجهراء ، صحيت الساعة ٩ صباحا فطرت سريعا و نزلت المستشفى ، سالت اروح فين دلوني على ال HR في السرداب (اللي هوه البدروم يعني) .. 

رحب بيا الاستاذ عزيز سوري الاصل ، و وداني عند موظفة فلبينية اسمها ايريزا ، قاللي انها المنوطة باجراءات عملي بالمستشفى .. اول مرة احاول اتكلم انجليزي فيما لا يخص الطب ، سواد الحلل ، كلمات ما اعرفش معناها و مصطلحات غريبة في النص .. كلام كتير وقع مني في النص ، اذكر اني ماكنتش باقول غير حاجتين (again please و what) وبقيت عامل زي اطفال البطريق الاستوائي لو كان في حاجة اسمها كده ، باتأتأ في الكلام و منظري مش ظريف خالص بصراحة ، المهم انها اخدت اوراقي ووصلتني بالاستاذ سامح مسئول الجوازات و اللي اخد ورقي و بدا يعمل اجراءات الاقامة و البطاقة المدنية اللي عرفت انها بتاخد على الاقل شهر علشان تطلع ، و من غير البطاقة المدنية لا تعرف تشتري او تأجر عربية و لا تعمل رخصة سواقة و لا تأجر شقة و لا حتى تشتري شريحة تليفون 

مضيت استلام العمل و وصلوني بالحسابات اللي ادوني تمن تذكرة الطيران وادوني كمان ٢٠٠ دينار تخصم من اول مرتب ، و سالوني اذا كان معايا تليفون علشان يعرفوا يوصلولي ، طبعا اخويا كان جابلي شريحة اديتهم رقمها ، و عرفت بعد كده انهم كانوا هيدوني موبايل بخط لو ماكانشي معايا ، و دي ميزة كبيرة في الخاص .. بيخلصلك كل اجراءاتك و انت قاعد ، حتى الكشف الطبي و التحاليل بياخدوك بالعربية تعمله و يرجعوك ، واحد يسالني هنا .. كشف طبي ايه و تحاليل ايه هما دول مش اتعملوا في مصر ؟! اقوله لا ياحبيبي هتعملهم تاني مش عارف ليه ، تقريبا مابيثقوش في اي حاجة اتعملت في مصر .. العقد الحكومي بقى بتعمل مشاويرك لوحدك و تخلص ورقك لوحدك ، وتقعد تسال في زمايلك عملوا ايه و تاخد تكاسي للوزارة رايح جاي وانت لسه جديد على البلد .. التكاسي هنا خراب بيوت مستعجل خاصة في البداية و انت لسه ما قبضتش تلاتة ابيض .. يعني علشان تاخد مشوار من الجهراء للوزارة رايح جاي مابياخدش تلت ساعة مثلا مش اقل من ٦-١٠ دينار مثلا و انت و شطارتك ، غير انك مابتقبضش قبل شهرين مثلا و ممكن توصل لست او سبع شهور كمان على حسب ورقك هيقف في انهو درج مكتب عند انهو موظفة مالهاش نفس تشتغل !! 

نتكلم بالمناسبة عن العملة الكويتية .. الدينار طبعا هو اكبر عملة عالمية بيساوي ٣.٤ دولار تقريبا و ده حاليا في حدود ٢٥.٧ جنيه مصري .. العملة خادعة للغاية ، ماتحسش انك دافع كتير ولكن تيجي تحولها بالمصري تلاقي الدنيا باظت خالص ، ودي مشكلة اي حد جاي جديد ، انه بيحسب كل حاجة بالمصري فبيتعب .. بعد شوية بتتعود على كده ، و لو عاوز تفهم الدينار كويس ممكن تقول انه يعامل معاملة ال ٥ جنيه هنا في مصر .. تدخل السوبر ماركت تلاقي نفسك دافع عشرة او خماشر دينار و انت كنت معدي بس قلت اما اشوف يمكن امنجه نفسي باي حاجة .. الخضار و الفاكهة غاليين جدا بصفة الكويت بلد صحراوي مش زراعي .. و اي حاجة اقل من دينار للكيلو تعتبر رخيصة و مافيش داعي للتفكير و انت بتشتريها ، اول مارحت جيت اصور ورق لقيت ان الورقة بخمسين فلس .. كلام فارغ يعني زي مانتو شايفين .. صورت ١٠ ورقات بنص دينار جيت احسبهم لقيتهم باكتر من ١٢ جنيه .. لكن المواد الغذائية مهما كانت مقدور عليها و مش بتفرق كتير في الاخر لان مرتبك ماشاء الله كويس ، لكن اللي يقطم الوسط فعلا السكن و المدارس و دول هييجي ذكرهم فيما بعد باذن الله .

المهم ان ايريزا (حد لسه فاكرها ؟!) وصلتني لرئيس قسم الاطفال وسابتني .. و لا اخفيكم سرا اني كنت مبسوط بمفارقتها جدا .. رئيس القسم د. محمد .. رجل بشوش الوجه طيب الملامح رحب بيا وشرحلي نظام العمل ، وبعت جابلي بالطو جديد عليه بدج المستشفى .. يوجد بالمستشفى ١٠ اطباء مسجلين اطفال ، ٣ مصريين و ٣ هنود و ٣ اردنيين (فلسطينيين) و طبيبة بلغارية ، كما يوجد ٣ اختصاصيين مصريين بخلاف رئيس القسم .. اخذني في جولة في ارجاء المستشفى .. نزل بيا الطوارئ عرفني على الدكاتره اللي في الشفت ، و بعدين طلع بيا على الحضانة و الداخلي ، و عرفني على رئيسة التمريض ، كل التمريض هنا كانوا هنود و فلبينيات .. واضح اني هاتعب في التواصل معاهم هنا .. 

المهم عرفت منه المعلومة الصادمة الاولى اني مش هاشتغل و احط ايدي على عيان الا لما ترخيص مزاولة المهنة يطلع ، و ده بعد ماتمتحن باذن الله .. طيب و الامتحان امتى بالصلاتو على النبي كده ؟ انت و نصيبك ممكن اسبوع ممكن  شهر ممكن اتنين  !! 

افندم ؟! شهرين ؟!!! يالهو بالي .. اه و النتيجة ممكن تاخدلها اسبوعين و للا حاجة بعد الامتحان .. طب والمرتب ؟! 

ماتقلقش مرتبك ماشي من يوم استلام العمل .. مش انت مضيت استلام عمل ؟ 

اه بس انا هاقعد اعمل ايه خلال الفترة دي ؟! ، ولا حاجة ليك ٨ ساعات يوميا عاوز تاخدهم على بعض من ٨-٤ او تاخدهم على فترتين split من ٩-١ ثم من ٥-٩ ايهما تختار ، وحاول تتعرف على طبيعة الشغل كويس علشان هتنزل لوحدك اول ما النتيجة تطلع باذن الله .. 

ماشي ، اهي فرصة مايبقاش عليا اي مسئولية واعرف ايه النظام كويس .. اخترت اني اجي فترة الصبح بس علشان ابقى فاضي بقية اليوم ، قاللي ماشي تقدر تقعد في الحضانة أو تنزل الطوارئ براحتك برضه 

لقيت الدكتور النوبتجي ساعتها الدكتور سوجو ، هندي الجنسية و معاه ماجستير من دولة روسيا الشقيقة .. لك ان تتخيل ، تبقى جاي اول يوم وعاوز حد من دورك تاخد و تدي معاه وتعرف ايه النظام تروح خابط اول ماتخبط في واحد هندي ، لا و معاه الماجستير الروسي حيث اللكنة الهندية مفعمة بالعبق الروسي ، اكيد هتعمل شغل جامد .. استأذنت اجي في اليوم ده split علشان الاقي حد اعرف اتكلم معاه بعد ما لقيت الدكتور احمد مصري الجنسية جاي الساعة ٤ ، رئيس القسم وافق بس قاللي اني لازم اتعود على التعامل مع كل زمايلي لاني هتتعامل معاهم علطول تسليم و استلام وكده ، قلتله ماشي بس على ما افك الخط بس .. قضيت بقية الوقت كيفما اتفق و روحت اتغديت ورجعت قابلت الدكتور احمد اللي صدمني صدمة السنين و التنين .. الاتنين مع بعض بالنسبة لواحد زيي المفروض انه سائل كويس على المكان قبل ما ييجي ..

ايه هيا الصدمة اللي صدمهالي ؟! .. ده اللي هييجي باذن الله في الحلقة القادمة ..

يتبع باذن الله ..

-------------------------

-------------------------

ذكريات الكويت (٥)

وصلنا لفين ؟!  .. 

اه وصلنا للصدمة العنيفة اللي صدمهالي الدكتور احمد اول طبيب مسجل اتكلم معاه ..

قاللي خير اللهم اجعله خير .. ان اخر اربع دكاتره جم خلال اخر سنتين سقطوا في الامتحان و روحوا مصر تاني يوم !!! 

روحوا فين ؟!! يا وقعه مربربه ؟! طب و بعدين ؟! 

ولا قبلين ، تعالى اما افرجك على الحضانه ..

ياعم حضانة ايه دلوقتي بس ؟! 

يعني انا ممكن ما اعديش في الامتحان ؟!

معنى كده ان الاستاذ حلمي ماصارحنيش بالحقيقة ؟! ده قالي انه انترفيو روتيني فقط لاغير ، طب الاستشاري اللي اخويا ساله ماقالوش الكلام ده ليه ؟! .. 

وانا اللي كنت فاكر نفسي وصلت للتايهة و عرفت المستشفى عن ظهر قلب قبل ما اجي .. 

طب هما سقطوا ليه ؟! 

والله لجنة الممتحنين اتغيرت ، اللجنة القديمة عمرها ما سقطت حد لكن اللجنة الجديدة مابتنجحش حد من ساعة ما مسكت الامتحان .. غالبا علشان الدكتور (.....) وده استشاري اطفال كان شغال هنا و اختلف مع الدكتور منصور العرف صاحب المستشفى و مشي من هنا ، بعد كده مسك رئيس قسم في الجهراء و بقى في اللجنة الممتحنة 

قصدك انه الموضوع مش علميا بقدر ماهو تصفية حسابات ؟!

والله دي كلها تخمينات محدش يقدر يقولك السبب الفعلي ، بس الامتحان مش امتحان بالمعنى الحرفي .. هوه زي الانترفيو كده ..

اه ماهي دي انا عارفها .. ايه الفرق بينهم بقى ان شاء الله ؟! مادي فيها سقوط و دي فيها سقوط !!

والله هما بيبقوا عاوزين يعرفوا انك شغال و نجم جيلك و ال presentation بتاعك كويس ( طبعا الكلام مش حرفي .. احمد بيه الراجل الكباره هيقولي نجم جيلك ؟!!) .. 

عرفت من تجميع الكلام من كل اللي سالتهم (مانا قعدت الف في المستشفى زي رضيع نقار الخشب لما بيبقى ملهوف .. اي حد عنده خبره في الموضوع باسأله بشغف) .. عرفت انك المفروض ماتتأتأش في الكلام وتحاول تقدم نفسك كويس و بالانجليزي و تعرفهم انت اشتغلت فين و المستشفيات اللي انت اشتغلت فيها كام سرير و امكانياتها ايه و هكذا .. وكده كده كل ما السي في بتاعك كان احسن كل ما كان الانطباع افضل و فرصتك في الفوز تكتر .. 

اما بالنسبة للاسئلة فهي اسئلة بسيطة مش حاجات over يعني .. حاجات من شغلك اذا كنت شغال كويس .. ثاني حاجة ما تحسسهمش انك نجم الجيل الوحيد في المنطقة ، انت برضه ليك limit مانتاش اختصاصي ، يحبوا تقولهم  (اسال .. استشير) اوي .. و مايحبوش يشوفو فيك شخص متكبر ، وفي النهاية تقعد تدعي ربنا ان اللجنة تتغير و ربنا يبعد عنك ولاد الحرام ، مع دعوة من الست الحاجة و كل حاجة هتبقى زي الفل و اخر ألسطة باذن الله بس انت ماتقاطعش .

طب السؤال اللي بيفرض نفسه : ليه يجيبوني الاول واقعد على قلبهم واخد مرتب من غير ما اشتغل ، لا و يعملولي كمان تامين صحي و بطاقة مدنية لان اجراءاتهم بتمشي كده كده ، وبعدين امتحن واسقط وارجع من غير ولا ايتوها فايدة ؟!! 

الاجابة تونس طبعا !!

لما رحت امتحن لقيت مستشفيات كتير بتتفق مع الدكاترة يبعتوا ورقهم و بعد الامتحان مايتحدد ييجوا على تاشيرة زياره يمتحنوا و يرجعوا بلدهم تاني واذا نجحوا يستكملوا ورقهم و ييجوا لما ترخيص مزاولة المهنة يطلع و يشتغلوا علطول .. مانجحوش خلاص 

اكتشفت كمان حاجة لطيفة جدا ، ان كتير من زمايلنا جايين عن طريق زمايل ليهم في المستشفى ، لا تقولي بقى الاستاذ حلمي و لا ١٠ الاف جنيه ولا اي حاجة .. كل القصة ان اي حد ينزل ال HR بتاع المستشفى و يديهم الورق بتاعي و صاحب المستشفى يمضي عليه و يراسلوني وخلصت على كده ، هما يخلصوا الورق ويبعتولي التاشيرة والعقد الموثق .. بل الادهى اني اكتشفت ان واحد معانا جه من سوريا عن طريق الاستاذ حلمي بالمراسلة .. يعني راسل الاستاذ حلمي و بعتله ورقه .. و الاستاذ حلمي راسل المستشفى ووصلهم ببعض واخد منه ٣ الاف دولار !!! 

اتعرفت على الدكتور محمد الاختصاصي و اللي جه معايا في نفس التوقيت تقريبا ، كانت خبرته اكتر مني بكتير بعد ما قعد اكتر من ١٥ سنة في السعودية ، و ماكانشي ورانا حاجة فكنت اقعد معاه كتير استفيد من خبرته ، سواءا العلمية او الحياتية ، كان راجل مخلص زمالة بريطانية و خبرته في مجال الحضانات ماشاء الله عليها ..

عرفت ان صاحب المستشفى استشاري نساء وولاده ودي اكتر حاجة مهتمين بيها هنا في المستشفى .. حتى ان رواتب بتوع النسا اكتر مننا خصوصا ال female بيوصلوا ١٨٠٠ دينار بالاضافة الى bonus على الولادات و ان ال rate بتاع الولادات هنا عالي قد يصل الى ٣٠٠ ولادة في الشهر ، ومعظم الشغل في الحضانة قائم على استقبال الولادات و الناتج عنها من اي مشاكل تحدث للطفل محتاجة تدخل 

الدكاترة الاردنيين التلاتة والطبيبة البلغارية كبار في السن عدوا الخمسين سنة وبيشتغلو في الطوارئ بس مالهومش في الحضانات ، فمعظم شغلنا حضانات و ممكن تنزل طوارئ في النص عالماشي كده مره او اتنين في الاسبوع على حسب الجدول ، و اللي ماسك الحضانات بيطلع يمر على قسم الداخلي اذا فيه حالات محجوزة

سعر الغرفه في المستشفى بيتراوح ما بين ٦٠ دينار حتى ١٠٠ دينار اقامة فقط في الليلة الواحدة والحالات اللي محجوزة معظمها tonsillitis !! الامهات ماعندهمش صبر على ارتفاع الحرارة ، وطبعا الحكومة عمرها ما هتديلهم ريق فبييجوا عندنا علشان نحجزهم ونعملهم كمادات وكده يعني .. وزي اي برايفيت ، مش عاوزين وش في حالات الداخلي ، اذكر اني مره كنت عاوز ادخل حالة نزلة معوية عادية ، الاستشاري بتاع اليوم ده رفض علشان البنت كانت diabetic و احنا مش عاوزين مشاكل .. ماشي اللي يريحكم

استقبال الطوارئ  الكشف ب ٢٠ دينار كواحد داخل لطبيب مجهول الهوية .. عاوز الاستشاري موجود ب ٣٠ .. وضرب الحقنة يامؤمن ب ٢ دينار

طبعا الاسعار عندنا غالية شوية بس في مستشفيات اغلى .. لكن ال range الطبيعي في الخاص في حدود ١٥ دينار للكشف .. الحكومة بتوفرلك كل حاجة ببلاش فليه تيجي عندنا الا اذا كنت عاوز خدمة سوبر لوكس ؟! تعالالي بقى في الادوية .. اسعار مضاعفة عن هنا اقل حاجة تلات او اربع مرات ، كنت عاوز اجيب مثلا في مره قطرة لل eye driness اللي بتتباع هنا ب ٦ جنيه لقيتها هناك بحوالي ٨ دينار ، بس الشهادة لله تلاقي الادوية effective بصراحة اكتر من هنا بمراحل حتى لو نفس الشركات التجارية طب ليه يجيبوا ادوية من الصيدلية ؟! ما إزازة الاوجمنتين موجودة في الحكومة ببلاش (بين قوسين للكوايتة بس .. المغتربين ليهم ادوية تانية نص لبة و لبة الا ربع و كده) ، طبعا انا ما اتعاملتش مع (بدون) خالص لان معظمهم بيروح الحكومة نظرا للحالة المادية ولكن معظم اللي بيجيلنا بيبقى محتقر الحكومة لان ال rate عندهم بيبقى عالي و مافيش وقت ياخدوا و يدوا مع الدكتور ، انما عندنا الدنيا هادية هدوء الزرافة في جنينة الحيوانات .. اكتر مرة جالي فيها حالات كانت ١٥ حالة مثلا في ال ٨ ساعات بتوعي ، و ايام كتير عدت من غير و لا حالة .. قاعد باشرب نسكافيه و شاي و ادور على حد اتحدوت معاه 

غير كده نظرتهم للحاجة اللي ببلاش نظرة ان دي حقي فلازم اخدها وخلاص ، معظم الحالات تكشف في الحكومة الاول و تجيلي بعدها مباشرة بس بعد ما يودوا الدوا اللي معاهم البيت علشان يقولك جبناله دوا الحكومة الازرق ابو خطين (غالبا زرق برضه) اللي انت عمرك ما هتعرف هوه ايه ، حاجة غلب ياعم والله ..

معظم ال levels اللي بيجولنا عندهم خادمات في البيوت .. وهما شعب بيفتخروا بكثرة الاولاد .. تلاقي واحدة داخلة عليك باربع عيال كل واحد له خادمة .. و هيا مش عارفه اي حاجة عن حالة الطفل ، تسالها يا امي بيجيله كحة تبص للخدامة تسالها و بعدين ترد عليك بعد ماتكون انت فهمت اصلا من الخدامة ، طبعا مش لازم اقولك انه عيب انت تسال الخدامة 

الخدامة هناك بتاخد مبالغ بسيطة ، في حدود ٥٠ دينار مثلا في الشهر بتبعتها لاهلها و بتاكل و تشرب و تعيش معاك .. بس المهم تبقى موفرلها المكان ..

استكملت تفقدي للمستشفى باقي اليوم و اتعرفت على كتير من الدكاترة الموجودين و قعدت اخد خبرة كل واحد عن الكويت وروحت اخر اليوم في قمة الارهاق زي ما حضراتكم شفتم ، تاني يوم ورايا قعدة مالهاش اي تلاتين لازمة وكلام كتير مع اي حد اخبط فيه و شاي و نسكافيه وكده فكان لازم انام بدري 

اشوفكم باكر باذن الله 

خ خ خ ...

يتبع باذن الله ..

--------------------------

--------------------------

ذكريات الكويت (٦)

صحيت من النوم تاني يوم بابص في الساعة لقيتها ٩ ونص .. 

ياخبر ابيض .. المفروض انزل الساعة ٨ علشان مهماتي المقدسة اللي انتو عارفينها .. 

انا مش من عادتي اني اتاخر و .. ترررررررررن

الو مين ؟! ايوه يادكتور احمد انا الدكتور محمد رئيس القسم انت فين يا دكتور ؟ ..

يادي الانطباعات اللي زي ال ....

آآآ انا نازل اهو حضرتك و ....

يادكتور احمد احنا مش في مصر هنا .. معلش يادكتور محمد انا اسف وحتى لو في مصر انا والله مش كده بس الظروف معلش يافندم

نزلت المستشفى و عديت على رئيس القسم اعتذرله على التاخير ، قالي انت لسه جديد في الغربة ولازم تاخد حذرك ، الدنيا مش بالسلاسة اللي انت فاكرها 

طلعت الحضانة لقيت فيها الدكتورة داليا مصرية الجنسية اقدم طبيب مسجل في المستشفى بقالها اكتر من ست سنوات ، من الملاحظ ان كل ماحد يعرف اني ليا اخ في الحكومة يسالني و مارحتش الحكومة ليه ، زي بالزبط السؤال اللي كل ماحد يعرف اني رجعت نهائي من الكويت يسألني ايه اللي رجعك !! هوه انا ماحدش طايقني في اي مكان كده 😳؟!!

حضرت كذا ولادة معاها و عرفتني النظام مبدئيا ، عرفت ان الولادة الطبيعية هنا هيا الاساس مش القيصري ، مش عاوز استطرد في كلام مش هيفيد اوي و لكن في النهاية الشغل بسيط جدا و مافيهوش حاجة صعبة ، و انت protected بالاختصاصي اللي موجود ، لو في اي مشكلة بتلجأله بالتليفون في اي وقت .. 

بمناسبة التليفونات ، التليفونات الارضي هنا ببلاش سواء للموبايل او للارضي .. يعني لو لقيت تليفون ارضي في سكتك ممكن تكلم اي حد بدون احراج ، في المطار كمان لو مالقيتش حد مستنيك هتلاقي تليفونات ارضية ممكن تكلم اي حد عادي من غير فلوس ، لكن اشتراك الخط الارضي لو عاوز تجيبه في بيتك هيبقى ب ٦٠ دينار في السنة ..

سعر دقيقة المحمول المحلية ٤٥ فلس ، يعني اكتر من جنيه في الدقيقة .. سعر الدقيقة الدولية لمصر ٢٤٠ فلس تقريبا .. ب ٥ دينار في الشهر ممكن تدخل انترنت على خط التليفون ويديك جيجا في الشهر بعدها سرعة النت هتقل بس هيفضل شغال تصفح فقط ..

بمناسبة ال protection بقى ، الدنيا في الكويت من ناحية ال medicolegal مافيهاش مشاكل اوي زي السعودية لان لو حد رفع قضية هيرفعها على المستشفى مش عليك شخصيا ، يعني لو عيان لا قدر الله مات منك وحد شك في اهمال طبي ، وده هنا مش زي السعودية اللي بيشتكوا عمال على بطال ، المهم انه بيعمل بلاغ في المخفر (نقطة الشرطة) و اخرهم يحققوا معاك و يترفع قضية على المستشفى ، في الحكومي اعتقد ان مافيش مشاكل بتحصل ، و عندهم القضاء شامخ زي عندينا بالضبط ، القضية بتقعد سنين و ماحدش بياخد منها ابيض و لا اسود .. في الخاص ممكن صاحب العمل يمشيك لو خايف على سمعته ، لكن ممكن تشتغل في اي مستشفى خاصة تانية عادي .. نقل الكفالة كان عادي من كفيل لكفيل مش لازم تروح بلدك لحد فترة قصيرة بعد ما انا جيت بقى لازم صاحب العمل يديك ورقة release .. و دي معناها انه لازم يوافق انك تشتغل في مكان تاني .. فلو علاقتك بيه وحشه ممكن مايديهالكش وساعتها لازم ترجع مصر ، تاني نقطة مهمة للغاية انك في البرايفيت بيبقى جواز سفرك في جيبك و ماحدش له عليك حاجة ، و كم من طبيب قعد شوية و اخد بعضه و مشي من نفسه كده و روح بلده ، وكم من واحد حصله ظروف زبط اموره و خطف نفسه راح مصر يومين ورجع في السريع ، الحكومة بيبقى لازم تاخد تصريح للسفر من وزارة الصحة و دي بتبقى حاجة روتينية بس بتاخدلها كام يوم كده .. 

المشكلة بقى اللي حصلت معايا اني لما جيت اقبض اول شهر ، و هما في الحقيقة كانوا١٠ ايام بس .. لاني استلمت العمل في ٢١ منه ، لقيت مخصوم مني ٣٠ دينار .. ليه يا اخوانا ؟! قالولي ده تامين ضد اخطاء المهنة و بيتخصم من كل الناس !! هوه انا لسه اشتغلت لما هيخصموا مني ؟! هوه كده ، مش عاجبك و لا ايه ؟! لا ياجماعة ده انتو لازم تخصموا طبعا .. بس انا كنت باستفسر بس ؟! اتضح ان صاحب المستشفى مأمن عليها تأمين ضد اخطاء المهنة و بيدفع شهريا لشركة التامين مبلغ و قدره ، فبيخصمه من العاملين ، ومن نصيبي بقى انه كان ٣٠ دينار و حد رفع قضية على المستشفى وكسبها فشركة التامين دفعت مبلغ خزعبلي كده ، مش عارف ٨٠٠ الف دينار حاجة زي كده .. فبالتالي تقريبا الشركة رفعت التامين او هوه بقى يامن بشريحة اعلى فبقى بيتخصم مننا ٥٠ دينار شهريا .. مبلغ برضه مش قليل ، وماكانش مكتوب طبعا البند ده في العقد ، مكتوب ان الراتب كذا و خلاص ، يللا حصل خير هاعمل ايه يعني ..

صدمة تانية بجملت الصدمات بقى ، لقيتهم بيقولولي دور على سكن علشان السكن ده اخرك فيه ٣ شهور بس !!! 

٣ شهور بس ؟! بس مكتوب في العقد سكن عائلي مؤثث او ٢٠٠ دينار ، و انا عاوز السكن مش عاوز الفلوس .. قالولي لا ، مش مكتوب في العقد مين اللي بيختار ، طلعت العقد ابص فيه لقيت فعلا مكتوب انهم بيدوني يا اما سكن يا اما فلوس بس مفيش حاجة تقول ان انا اللي باختار .. عم حلمي منه لله بقى هوه اللي اوحالي ان انا اللي باختار ، وطبعا السكن ده مشكلة في حد ذاته .. اولا الحكومة بتدي بدل تأثيث ١٠٠٠ دينار واذا مشيت قبل ما العقد يخلص بترجع نصهم .. طبعا ده مبلغ محترم جدا و تقدر تجهز بيه ميه ميه ، اللي حاصل عندنا بقى ان العقود زمان كان فيها بدل تاثيث و بعدين اتلغى علشان دكتور مصري منه لله نصب على صاحب العمل واخد بدل التاثيث و رجع مصر !! اه والله زمبؤلكم كده .. موقف تاني .. كان بيبقى في اجازة مؤتمرات مدفوعة الاجر اسبوع سنويا و حد راح ضاممها لاجازته من غير مايكون في مؤتمر و لا حاجة و سافر و مارجعش تاني فاتلغت هيا كمان .. هوه الدكاترة بيعملوا كده ليه ياخواننا ؟! 

المهم .. نتكلم شوية عن السكن بقى ، المناطق في الكويت ممكن تقسمها الى مناطق مغتربين و مناطق كوايتة ، مناطق الكوايتة بتبقى فلل دورين ، راقية ولكنها هادئة جدا و مافيهاش حركة كتير ، والمحلات بتبقى على شكل تجمعات لوحدها كده ، فلما الدنيا بتظلم تلاقي هس ولا صوت ، و الاضواء خافتة مش عارف ليه ، قالولي انهم شعب بيحب الخصوصية ، نفس الكلام تلاقيه في الحدائق العامة و الكورنيش ، تلاقي انوار خافتة جدا .. المهم مناطق الكوايتة دي بتتكون ازاي بقى .. المواطن الكويتي لما ييجي يتجوز حقه انه ياخد من الدولة ارض وقرض .. ياخد القرض يبني بيه الارض و يسدده على مدار حياته .. بيبني دورين .. دور يعيش فيه و ده التحتاني غالبا و الدور التاني براحته بقى ياجره للمغتربين امثالنا يجيبله عائد شهري او يعمل سلالم داخلية ويوسع على نفسه او لو من عائلة مفتخرة ممكن يعمل (ديوانية) واللي هيا مكان تجمع و سهر مفتوح للجميع ، تيجي تشرب شاي قهوه و ممكن تلاقي حد جايب شيخ يقول محاضرة او واحد معاه عود و يسلطن القاعدين ، ودي بتبقى اكتر للتباهي ، العائلات الشديدة لازم تعمل ديوانية اومال .. 

المهم ان الموضوع ككل حاجة إشطات كده .. لا و ممكن تلاقي (وفي مناسبة ما) حصل عفو ملكي عن القروض .. يللا انشالله حد ماحوش .. 

للاسف مناطق البدون عاملة زي العشوائيات عندنا بالزبط ، وتلاقي البيت من الطوب و السقف صفيح ، ماتحسش انك في الكويت ابدا ..

مناطق المغتربين بقى بتبقى عمارات غالبا في وسط محلات ، والدنيا هايصة شوية .. عامة المحلات هناك في معظمها بتقفل الساعة ١٠ مساءا فبتلاقي هس برضه بعد المعاد ده .. 

اسعار السكن زادت جدا في السنين الاخيرة .. الجهراء تعتبر من ارخص المناطق لكن تلاقي اوضة و صالة بس بتتراوح مابين ١٧٠ الى ٢٠٠ دينار شهريا ، غير انك بتدفع نص شهر للبواب قبل ما تسكن .. عاوز بقى تدخل في سكة اوضتين صغيرين اد الحق تلاقي نفسك داخل في ٢٥٠ وللا حاجة .. مناطق الكوايتة بتبقى الشقق اوسع وافضل بس اللي مش واخد على العزلة والهدوء مايحبش يسكن هناك .. بس ممكن تلاقي ٣ اوض و صالة كبيرة في حدود ٣٠٠ دينار ، الايجار بيبقى شامل الماية و الكهرباء ، و غالبا بيبقى السكن بتكييف مركزي علشان درجات الحرارة اللي بتوصل ٥٠ درجة واكتر 

العاصمة و الاماكن الارقى طبعا الايجار بيبقى اغلى من كده بكتير .. يعني السكن في السالمية ممكن يوصل ٤٥٠ دينار شهري مثلا .. في بقى استوديوهات صغيرة بتبقى من غير اوض ، يادوب صالة بالحمام و المطبخ ودي غالبية اللي بيقعدوا فيها بيبقوا طبقة العمال و الصنايعية ، اسعارها اقل طبعا ممكن توصل ١٥٠ دينار وللا حاجة ، لو انت عزابي ممكن تاخد حاجة زي كده اذا استحملت لان غالبا بتبقى حواليك عمال هنود وصنايعية و روايح و حشرات و حاجات مش لطيفة خالص ، ممكن تلاقي ذبابة الفاكهة مثلا ، و انت في الغالب مش رايح تبهدل نفسك يعني  

نرجع تاني للمستشفى .. كده عمك حلمي عمل فيا الدنيئة في كذا حاجة .. موضوع الامتحان و ده الاسوا .. موضوع السكن لانه اوحالي اني انا اللي باختار .. موضوع ال ٥٠ دينار اللي بتتخصم شهري .. ده غير طبعا انه سابني في البداية لوحدي اعمل اجراءات السفر مع نفسي .. يللا ماحدش بيتعلم ببلاش 

المشكلة دلوقتي في الامتحان .. الموضوع ده طبعا فضل مأرقني و عمال احلم كل يوم اني راجع مصر اجر اذيال الهزيمة .. و منظري هيبقى ايه قدام للناس ؟! يقولوا عليا ايه .. طب و اهلي و مراتي ، هل هاسقط من نظرهم .. وهل ممكن ارجع تاني الكويت اذا لا قدر الله و حصل حاجة ؟! .. هذا ما سيتضح في الحلقات القادمة ..

يتبع باذن الله ..

------------------------------

------------------------------

ذكريات الكويت (٧)

أقول و بالله التوفيق ..

اسبوعين تقريبا قضيتهم بنفس الطريقة .. رايح من البيت للشغل و من الشغل للبيت .. خرجت مع اخويا في بعض الايام استكشفت البلد معاه .. و باقي الايام كنت كنت باقعد اذاكر .. لقيت كتاب بروتوكول وزارة الصحة هناك في طوارئ الاطفال رئيس القسم اداهولي ، قالولي انهم بيحبوا الاجابات تكون منه .. و كان معايا كمان كتاب (النجار) رايح جاي بيهم .. 

التحق بنا دكتور هاجوب (او يعقوب) سوري من اصل أرميني في الاربعينيات من عمره كطبيب مسجل وده كانت حكايته حكاية .. من سنتين قصفت قوات بشار الاسد مدينته و ضربت عيادته اللي كانت شغالة كويس جدا بالقنابل .. راح ارمينيا و قعد هناك سنتين الظاهر انه ماعرفش يشتغل او كده فقرر يسافر .. بس شهاداته كانت ضاعت في القصف ، لازم يعمل بدل فاقد و مش عارف يروح سوريا تاني ، عمل مغامرات علشان يطلع الشهادات ، لدرجة انه جايب الشهادة مبهدلة لان اللي كان شايلها كان عمال بيجري في منطقة خطرة و القناصة بيضربوا على اي حد معدي النار و حط الشهادة في هدومه من جوه .. حاجة افلام اكشن كده .. المشكله انه كان ما اشتغلش حضانات وشغله كله شغل عيادات وطبعا ماذاكرش من زمان غير طبعا ان الطب في سوريا بالعربي فكتير من المصطلحات ماكانشي عارفها ، فكان قلقان جدا من موضوع الامتحان ده ، قعدت اطمنه و اقوله ماتقلقش ده انترفيو مش اكتر .. و انا اساسا ربنا عالم بحالي 

اتعرفت كمان على الدكتور محمد الرجل الازهري والنجم الساحلي بتاعنا .. قعد في المملكة العربية السعودية بالتحديد في الاراضي المقدسة ييجي ٥ سنين و بعدين جه على الكويت .. و له عدة افضال عليا بعد ربنا سبحانه و تعالى ، اولا كان واخد الدنيا ببساطة شديدة و بيحاول يحسسك ان الشغل اسهل مايكون و ان مافيش حاجة مستاهلة وكم من طبيب ما استريحش هنا و راح هناك او ما استريحش هناك و جه هنا ، ثانيا كان خدوم بشكل كبير و مابيبخلش لا بمعلومات و لا بمشاوير معاك لو كنت محتاجه ، غير كمان انه كان احدث مسجل اطفال في المستشفى واخر واحد عدى من اللجنة بتاعت الامتحان و غير انه كان ليه خبرة لا باس بها في السعودية و عرفت منه كتير من الفروق بين البلدين و معلومات كتير من اللي باقولها هنا مقتبسها منه ..

في كمان الدكتورة (اوباما) هندية الاصل و المنشأ و اللي كنت فاكرها راجل لحد ما قابلتها و منها عرفت ان الهند فيها مئات اللغات مش لغة واحده لاني لقيتها بتتكلم انجليزي مع التمريض الهندي واللي معظمه هنا من حته اسمها كيرلا وبيتكلموا لغة اسمها ماليالام ، و لكنة اوباما الانجليزية افضل بكتير منهم بصراحة ، الدكاترة الاتنين الهنود من كيرلا برضه الدكتورة انيتا و الدكتور سوجو سالف الذكر، لكنتهم الانجليزي صعب التعود عليها شوية بس كده كده مع الممارسة بتقدر تتفاهم معاهم على قد ما تقدر 

التلات دكاترة الاردنيين عرفت انهم كانوا في الحكومة و طلعوا عالمعاش فجم هنا بعدها ، بس ماكانش بينهم و بين الباقيين اختلاط كبير لانهم كانوا شغالين في الاستقبال فقط ، و ده كان مدايق الجماعة التانيين شوية لان شغل الطوارئ بيديك bonus على حالات المحاليل و جلسات الاستنشاق و ال admission .. انما الحضانة مافيهاش ، و ده اللي اكتشفته بعدين و ماكانشي مكتوب في العقد برضه ، بس دي كانت نقطة في صالحي لانه في الغالب كان بيعوض ال ٥٠ دينار اللي كانت بتتخصم شهريا من المرتب علشان يرجع مرتبك زي ماهوه في العقد و ممكن يعدي كمان لما ال rate يبقى عالي شوية

الخلاصة اني قعدت شهر كامل ماباعملش حاجة في المستشفى غير اني باقرا و اتكلم و اشرب لحد الامتحان اللي اتحدد قبلها باسبوع تقريبا ، كان يوم تلات قالولنا ان الامتحان التلات الجاي ، طبعا الواحد اتخض و tachcardia وكده .. انا اتعودت على قعدة الدرفيل اللي انا قاعدها ، و مش مستعد اغير نظامي خلاص .. المهم انهم جم يوم الاتنين اللي بعده قالولنا ان الامتحان اتاجل اسبوع كمان ، مش عارف دي تبقى مصلحة و للا ايه ، من ناحية تقول اهو لاقدر الله لو حصل حاجة و ماعديتش يبقى الايام دي محسوبة من المرتب .. على الاقل اعوض الخسارة اللي انا خسرتها قبل ما اجي ، ومن ناحية تانية عاوز اخلص ماهو وقوع البلا ولا انتظاره .. المهم انهم تاني يوم رجعوا في كلامهم و قالولنا الامتحان بكره الاربع .. 

ايه اللي حصل بقى؟  .. الدكتور اللي كان بيسقط الناس حصلتله ظروف و مش هيعرف ييجي فأجلوا الامتحان اسبوع ، بعدين جت مستشفى (طيبة) و اشتكت لانها كانت متفقة مع دكتورة امريكية معاها بورد امريكي اتعرفنا عليها في الامتحان ، انها تيجي على الامتحان و ترجع امريكا تاني ، طبعا بعد ماجت قالولها ان الامتحان اتاجل قالتلهم لا خلاص مش شغالة معاكم انا باحب احترام المواعيد وكلام زي كده ، فالمستشفى اشتكت قاموا مرجعين الامتحان من غير الراجل اياه و جابولنا اي حد تاني .. الحمدلله

احنا دلوقتي جوة اللجنة انا قاعد عمال اعرق في البدلة التي تجعلني فاتنا على رأي رفعت اسماعيل مع اننا في شهر يناير وقدامي ٣ دكاترة كوايتة معاهم السي في بتاعي قاريينه كويس بل ومن الواضح انهم متناقشين فيه كمان قبل ما ادخل ، اتفضل يا دكتور احمد عرف نفسك ، انا احمد حسان اخصائي أطفال مصري الجنسية و .. by english يا دكتور لوسمحت ، طبعا انا كنت حافظ قطعة بالانجليزي تحسبا لمثل هذا الموقف و مزبط ال grammars وكله تمام ، رصيت الكلمتين وكده ، كان رئيس اللجنة بتاع neonatology سألني فيه و الاتنين التانيين سالوني اسئلة عادية عن ال GE و ال OM ، كتاب البروتوكول بتاعهم كان مفيد جدا بس اسئلة النيونيت من براه ، والاسئلة بصفة عامة كانت كلها clinical مش نظري بالمعنى المفهوم ..

الدكتور يعقوب قالوله انت ما اشتغلتش حضانات خالص و بالتالي ما سالوهوش في ال neonatology ، بس كان بيقول اسئلة سهلة و هوه جاوب معاهم كويس برضه ، اما الدكتور محمد الاختصاصي فلقوا السي في بتاعه كله نيونيت حتى ان رئيس اللجنة قاله انت خبرتك اكتر من خبرتي في النيونيت بس انت جاي انك اختصاصي اطفال مش نيونيت ، رد و قاله انا بعت السي في بتاعي للمستشفى و هما بعتولي بعد ماعرفوه فالمفروض ان طبيعة الشغل محتاجة كده ، بس انا معايا زمالة بريطانية في الاطفال و اتفضلوا اسالوني في اي حاجة .. محدش ساله في الاطفال بيقول بس كان قلقان من الحوار ده شوية ..

المهم خلصنا و السواق بتاع المستشفى رجعنا في العربية الهيونداي توكسون ٢٠١٤ الفارهة ..

قعدنا منتظرين النتيجة ١٨ يوم مع انها المفروض لجنة شفوي و تعرف في ساعتها عديت و للا لا و خلاص .. بس كل الناس كانوا بيقولولنا no news is good news و طالما اتاخروا في الرد يبقى الحمدلله غالبا عديتم بس اجراءات اصدار الترخيص بتتاخر شوية .. خلاص ادينا قاعدين مستنيين الفرج ، طبعا قبل الامتحان كنت باعمل ثلات حاجات شرب و كلام و مذاكرة ، دلوقتي ما باعملش غير حاجتين .. شرب و كلام .. لحد ما يوم كنت قاعد في السكن و لقيت رسالة عالفايبر من الدكتور احمد بيقوللي الف مبروك ياعم .. 

الحمدلله بس الامر كان متوقع لانهم اتاخروا في الرد .. 

لا انت عديت انت و الدكتور محمد لكن الدكتور يعقوب ماعداش للاسف ..

ياخبر ابيض ؟!!! ده انا كنت في خطر و انا مش داري بقى .. بقيت زعلان على الدكتور يعقوب جدا بصراحة و مابقيتش عارف اكلمه اواسيه و للا هيزعل اكتر لما اكلمه انا بالذات .. احساس في قمة السوء بصراحة ، الحمدلله اني مامريتش بيه .. الراجل بعتوله في ادارة المستشفى و ادوله تذكرة سفره و بقية حسابه و ماشفتوش تاني بعدها ..

طبعا ليك فرصة تانية في الامتحان بعد ٣ شهور تقريبا بس هتقعد ازاي في البلد علشان تمتحن ، و على كفالة مين ؟! دكاترة من اللي مانجحوش قبل كده وزعوا ورقهم و عملوا مقابلات مع رؤساء اقسام التخصص في مستشفيات الحكومة و راحوا مصر و رجعوا بعدها لما ورق الحكومة خلص من غير امتحان و لا يحزنون ، و دكتور زميلنا ما عداش جه بعد ما انا جيت بشهرين و للا حاجة ، رجع مصر قعد التلات شهور و جه الكويت على مستشفى خاصة تانية امتحن و عدى و هوه دلوقتي شغال فيها .. يعني الكويت ما اتقفلتش ولا حاجة لو ماعديتش ، من القصص اللي سمعتها ان في دكتورة تخصصها مناظير كانت جاية على مستشفى خاصة و في الامتحان عجبهم تخصصها و سقطوها و قالولها تقدم في الحكومة و هياخدوها لانهم محتاجين خبرتها في الحكومة !! عامة انت غالبا بتبقى لضمت مع دكاتره هناك ممكن يقدمولك و يتابعولك الورق و كده ..

المهم انا الحمدلله عديت و خلصت من الوش ده ..

قدامي بقى مهمات كتيرة .. و قصص و حوارات .. السكن .. العفش .. العربية .. داخل على تغيير جذري في الاحداث ، هنبتدي نتعايش مع الكويت بقى .. بس ابتدي منين و اروح فين .. جايلك ياليكويت ..

يتبع باذن الله ..

--------------------------

--------------------------

ذكريات الكويت (٨)

انا كده بقالي شهر و نص يادوب خلصت امتحان  .. لاحظوا اني كل اللي قعدته هناك سنة مش اكتر .. 

لما جيت اقبض تاني شهر قالولي مخصوم مني حوالي ٥٠ دينار تمن رخصة مزاولة المهنة المؤقتة .. طب و ليه هيا مؤقتة ؟ اكيد علشان في رخصة دائمة يعني مش محتاجة فكاكة !! ومابتطلعش الدائمة علطول ليه ؟! والله اجراءاتها بتاخد فترة ..

طب و انا هادفع حاجة تاني في الدائمة ؟! 

لا هتدفع ٤٠ دينار كمان في اشتراك الجمعية الطبية الكويتية .. 

بس انا مش عاوز اشترك في الجمعية دي ..

مش بمزاجك ياحبيبي .. لازم تبقى عضو في الجمعية علشان تطلع ترخيص مزاولة المهنة .. وهنخصم منك كمان حوالي ٢٠ دينار طوابع و ختم ..

ختم فين بالضبط ؟!! لا معلش انا ماحدش يقدر يخ ... 

يابني الختم اللي هتختمه على الروشتات .. مش فاكر انا قلتلكم وللا لا انه علشان تصرف اي دوا من اي صيدلية في دولة الكويت لازم يكون بروشتة طبيب موقعة و مختومة بختم الطبيب .. الختم و فورمة توقيعك متسجلين في وزارة الصحة .. يعني لو حصلت مشكلة من الدوا اللي انت كاتبه وللا حاجة هتتجاب هتتجاب ، مش نظام بقى هاتلي بخمسين قرش دوا كحة و اتوصى زي عندينا في مصر .. بس بعض الدكاترة للاسف بيسمسروا من ورا الموضوع ده .. بيختم للصيدلي على الروشتات و ياخد نسبة من الربح .. عافانا الله و اياكم من حاجة زي كده ..

المهم اتخصم مني شوية مبالغ كده لا ناقة لي و لا جمل فيهم ، و كنت حاسس اني بيتنصب عليا الصراحة بس مش قادر اتكلم .. انا مالي انا و مال ترخيص مزاولة المهنة .. انت راجل جايبني اشتغل عندك بعقد ، و المفروض انك مسئول تطلعلي اوراقي اللي تخولني اني اشتغل عندك بما اتفقنا عليه في العقد المبرم بيننا .. ماعلينا .. عامة وزارة الصحة بيحصل فيها نفس الكلام ده .. ماتدقش 

ترررررن .. الو مين ؟ ايوه يادكتور احمد انا الدكتور محمد رئيس القسم .. 

ازي حضرتك يافندم لعلك تكون بخير ..

لو فاضي شوية تعالالي ..

خير يافندم في حاجة ..

تعالى بس و انا هابقى اقولك .. 

ماشي يافندم تحت امرك .. تك

خير اللهم اجعله خير .. هوه بيكلمني باقتضاب كده ليه ؟! بدا الفار يلعب في عبي خاصة انه ماكانش في وقت الشفت بتاعي .. اكونشي غلطت في حاجة معينة ؟!! يكونوش رجعوا في كلامهم و سقطوني في الامتحان تاني ؟!

رحتله و انا في قمة القلق بصراحة .. طلع عاوز يقوللي ان الترخيص و الختم بتوعي جم !! طب ماقلتليش ليه في التليفون طيب ؟! عرفت ان دي طريقة الدكتور محمد علطول ، عالعموم الحمدلله ماطلعتش حاجة وحشة .. الكلام ده كان بعد اسبوعين تقريبا من ظهور النتيجة بتاعة الامتحان ، دلوقتي اقدر اشتغل في الطوارئ من غير مشاكل ..

الى هنا اعتقد ان الناس اخدت فكرة كويسة عن الكويت من الحلقات اللي فاتت .. وده اللي انا معني بيه في المذكرات دي .. يعني باذن الله بعد كده هاكتب ملاحظاتي الشخصية عن البلد تتخللها بعض الاحداث لاعطاء امثلة مش اكتر ..

عندي مهمتين اساسيتين دلوقتي .. اجيب شقة وافرشها ، واجيب عربية وارخصها .. ابتدي بمين ؟!

اولا طبعا لازم استنى لما البطاقة الشخصية تطلع و ده اخد حوالي ١٠ ايام كمان ليكتمل الشهرين قبل ما احط رجلي في اي مصلحة ، بيتهيألي العربية اهم في الاول علشان اعرف اروح من البيت للشغل و من الشغل للبيت .. مش هينفع موضوع التكاسي ده معايا ، غير انه مكلف ، مابتلاقيش التكاسي ماشية في الشارع كده زي مصر .. لا معظم الاحيان بتاخد رقم سواق تاكسي من اي حد و تقوله يجيلك يوديك ويجيبك ، ده اذا كان فاضي اصلا .. لاحظوا ان مواعيد الشغل عندي ملخبطة خالص .. يومين الصبح و يومين العصر و يومين منتصف الليل ..

المشكلة عندي حاليا اني لازم اعمل رخصة سواقة قبل ما اجيب العربية لانك لو اتقفشت من غير رخصة ممكن تترحل على بلدك عدل ، قالولي ممكن تعمل استبدال الرخصة المصرية ، وده متاح ليك كشهادة عليا ، يعني مش متاح للجميع ، رحت القنصلية المصرية وثقت رخصتي المصرية ، و بعدها عالخارجية الكويتية و دفعت ١٥ دينار مثلا في الحوار ده ، توثيق الورق غالي الصراحة ، انت ممكن توثق شهاداتك من الكويت بس يستحسن توثقها كلها قبل ماتيجي علشان التكلفة هنا عالية ..

المهم اخدت ورقي و رحت بيه المرور بعد عناء و الاقي اللي بيقوللي ان استبدال الرخصة المصرية اتلغى يا دكتور معلش !!

يا ولاد اللذينا ، بعد كل التوثيقات و المشاوير دي ؟! بس دكتور زميلي لسه عاملها من اسبوعين و للا حاجة .. قاللي لا حضرتك الموضوع ده فنيتو ، و لازم تقدم عالامتحان بقى من اول وجديد .. حسيت انه عاوز يقوللي (وابقى قابلني) بس هوه ماقالهاش الصراحة .. عرفت من الناس اللي حواليا ان الامتحان هنا صعب و لازم تسقط مرة على الاقل وبيحددوا الامتحان بعد شهر و حوار كده ، بس للامانة كان كل اللي عنده خبرة في الموضوع ده موظفين لان الدكاترة كانوا بيغيروا الرخصة المصري عادي ..

يوووه بقى ، واضح ان الكويت مش بالسلاسة اللي انا كنت متخيلها .. من غير عربية العيشة هنا هتبقى صعبة ، ده حتى المسجد ماتقدرش تروحله مشي حتى لو جنب البيت من شدة الحرارة ، مرة قلت اتمشي للمسجد ساعة صلاة العشا ، ماكانش بعيد اوي عن السكن ، وانا ماشي حسيت ان الشمس فوقيا عدل  ، بصيت لفوق اذ ربما الاقيها .. مالاقيتش حاجة !! 

قعدت اسبوع و للا حاجة متدايق و بعدين قلت اما امشي في اجراءات الرخصة الجديدة و خلاص ، وساعة ما جيت اقدم ورقي ولا بيا ولاعليا لقيت واحد داخل للمقدم و معاه ورق تغيير الرخصة المصرية !! كان معايا الورق الاولاني قمت داخل بيه راح موقع عادي خالص و لا كأن كان في حاجة !! 

اومال ليه بقى الكلام ده من الاول ؟! و من هنا عرفت ان مافيش قوانين ثابتة في الكويت ، اي حد بيعمل اي حاجة بمزاجه .. واحد زميلي بعد شهرين كده راح يعملها قالوله اتقفلت ، دي كانت موضة و بطلت للابد .. بس واحد تاني راح عمل اجراءات الرخصة الجديدة فكانوا سلسين معاه خالص و حددوله الامتحان علطول لما عرفوا انه دكتور و يكاد يكون ما امتحنش .. عدوه علطول

الوسط اللي انا اتعاملت معاه معظمه بيحترم الدكاترة جدا .. لدرجة اني في مره كنت ماشي بالعربية مخالف و حد من المرور وقفني و قعد يزعق و يتهبد قدامي علشان ما وقفتش علطول اول ما نادى عليا ، مع اني ماسمعتوش والله ، اول ماعرف اني دكتور قعد يتاسفلي و يقوللي ماقلتش ليه يادكتور ، انت تخالف زي مانت عايز ، انت على راسنا من فوق  .. طبعا انا انتهزت الفرصة و قعدت اقوله انت ازاي تتجرأ و كده 😜 !!

الحمدلله خلصت من قصة الرخصة دي و عاوز اجيب عربية بقى .. العربيات هنا مبهرة جدا بصراحة .. ماركات تانية خالص غير اللي عندنا ، اكتر من نص العربيات في البلد 4x4 ، اشي فيراري على كرايسلر على كاديلاك و انفينيتي .. طبعا دي الكوايتة بس هما اللي بيشتروها .. الكوايتة بصفة عامة كل فيللا تلاقي قدامها ٣ او ٤ عربيات ، واحدة للبر وواحدة للسبق وواحدة لمش عارف ايه .. وطبعا سوق العربيات المستعملة رهيب و الاسعار رخيصة الى حد كبير عن مصر .. مابيقعدش معاهم عربيات و بيغيروا علطول .. ما تلاقيش عربيات اقل من موديل ٢٠٠٠ غير نادرا ، و العربيات كلها اوتوماتيك ..

سالت انسب عربية لواحد جاي سنة و راجع قالولي اكتر عربيات بتحافظ على سعرها التويوتا و النيسان و اللانسر .. ايه البواخة دي ؟! مش هاجيب عربية بي ام او جاجوار و اعيشلي يومين بقى ؟!

والله العربيات اللي قلنالك عليها ممكن سعرها ينزل ٢٠٠ دينار و للا حاجة سنويا .. انما التانيين غير انهم ما بيتباعوش بسهولة سعرهم بينزل الارض ، ده غير ان قطع غيارهم غالية جدا ، يعني ممكن لو حصل مشكلة في العربية تدفع قد تمنها في التصليح ، يا اخوانا انا شايف عربية جاجوار موديل ٢٠٠٦ بتتباع ب ١٥٠٠ دينار .. انت حر بس ماتبقاش تقولنا مانصحتونيش ليه و كده 

مش عاوز اطول في موضوع العربيات كتير ..

امري لله .. دخلت على مواقع الانترنت و قعدت ادور على العربيات لحد ما استقريت على عربية كويسة ، كلمت صاحب العربية تليفونيا و رحت اتفرجت عليها وجبتها ، عربية تويوتا ياريس ٢٠٠٧ ب ١٥٠٠ دينار يعني بنص تمنها في مصر مثلا .. بقى ياناس الياريس بتمن الجاجوار ؟!! ارزاق بقى ..

نيجي للشقة بقى ، ماكانشي قدامي كتير علشان ادور على شقة ، فاضللي شهر في السكن المؤقت بتاع المستشفى قبل ما يكرشوني ..

قبل ما اجيب العربية لقيت واحد زميلي بيتصل بيا يقوللي في شقة قريبة المستشفى واحد صاحبنا ماشي منها ، اوضتين صغيرين وصالة ب٢٠٥ دينار في الشهر ، كويس والله ، طبعا الاسعار كانت اغلى من كده لو انت بتدور على اوضتين بس دي بالذات كان ليها ظروف كده و الحمدلله  مشي الحال ، نيجي للتجهيز بقى 

طبعا التجهيز مدارس .. بالنسبالي كواحد مش عاوز يقعد كتير برضه ، رحت مكان اسمه الحراج وده بيبقى فاتح خميس و جمعة فيه كل حاجة مستعملة و جديدة كمان لو عاوز ، اسعار ارخص من بره ، اتفرجت و حطيت عيني على حاجات معينة و دفعت مقدمات و بعدين اتفقت مع عربية نص نقل ، و كام عامل كده منتشرين في المكان و بيلزقوا فيك زي صغار الفقمة (اذا كانوا بيلزقوا يعني) لما يعرفوا انك بتجهز شقة ، شاورتلهم عالحاجة بس و هما حملوها عالعربية و دفعت باقي الفلوس و خلصنا كل حاجة في نفس اليوم بفضل الله 

دفعت حوالي ٥٠٠ دينار مثلا بالنقل بالتركيب بكله في اوضتين و صالة و اجهزة كهربائية ازعم انهم كويسين الى حد كبير ، طبعا انت و نظامك .. ممكن تجيب الاجهزة الكهربائية جديدة باكتر من السعر ده ..

بس الرفايع بتجمع الصراحة ، شوية فرش على ادوات مطبخ لقيت نفسي داخل في ٢٠٠ دينار و للا حاجة 

خلصت فرش على اخر التلات شهور بالزبط و اخدت بعضي و نقلت .. 

ايه اللي حصل بعد كده .. تابعونا في حلقة جديدة من حلقات ..

يتبع باذن الله ..

-----------------------------

-----------------------------

ذكريات الكويت (٩)

اتكلم على الجانب الديني شوية .. الكوايتة طبعا شعب متدين بطبعه زيينا كده بالزبط !! .. اللي عاوز يلتزم الموضوع بسيط جدا ، وزارة الاوقاف من الوزارات اللي فيها شغل عالي الصراحة .. المساجد كبيرة كلها و مريحة نفسيا اشي كالونيا و اشي مناديل و نظافة ايه ، ماتلاقيش مسجد تحت عمارة مثلا و للا زاوية الا فيما ندر .. وكل مسجد له الامام الراتب بتاعه و دول لازم يكونوا حافظين القرآن الكريم كاملا ، و غالبا واحد او اتنين بيسموهم مقيمي شعائر بيأذن و يقيم و يصلي امام لما الامام مش بيبقى موجود .. طبعا اصواتهم كلهم جميلة ماشاء الله .. مافيش حاجة اسمها حد يقعد يتعازم على الامامة و ابو دقن هوه اللي يؤم او الاكبر سنا و كده .. ولا تلاقي واحد بيصلي بيك من غير تجويد و لاصوت و لا اي مقومات للامامة ، ومعظم الأئمة هناك مصريين ..

بالنسبة لحفظ القران الكريم عندك دورة كل ٣ شهور ممكن تحفظ مع امام المسجد لحد ٣ اجزاء و تدخل امتحان على مستوى الكويت و تاخد فلوس مش بطالة .. تاخدلك ٨٠ دينار مثلا على الاجزاء التلاتة ..

غير كده في حلقات proffesional لها مسميات عده منها (الأترجة) مثلا ، و بتبقى بالتنسيق مع الوزارة و فيها امتحانات و تيرمات و تلاقي برضه نازللك فلوس زيادة على مرتبك كل تيرم .. ممكن تاخدلك ختمة قران مع امام المسجد خلال ٤ شهور تقرا معاه القران كله و تاخد ٥٠ دينار كمان ..

في رمضان بقى حدث و لا حرج ، مساجد كتير بتعمل مسابقات في القران الكريم  و جوائز تصل الى ٢٥٠ دينار مثلا في سورة المؤمنون بس .. عندك ختمة يوميا بعد صلاة الفجر ممكن تديك مبلغ محترم برضه لو ختمت معاهم في الحلقة ..

طبعا لو عاوز تصلي التراويح ورا مشاري مثلا فالامر متاح لطبيعة المسافات ، و في مساجد بتتفق مع قراء مميزين من السعودية زي فارس عباد و سعد الغامدي وتعرف انهم هيصلوا في المسجد الفلاني ليلة كذا لو انت بتدور ..

الاعتكاف في العشر الاواخر متاح في بعض المساجد حسب جدول وزارة الاوقاف و بيصرفوا عليك اكل و شرب كمان ، بتفطر و تتسحر لحمة و فراخ و مجبوس (اللي هوه زي الكبسه يعني) يوميا على حساب الوزارة ..

انا طبعا باقول المبالغ دي للتشجيع ، لكن طبعا الثواب و الاجر ده طبعا فوق كل حاجة .. 

دروس بعد الصلاة موجودة بجداول و فيها مشايخ كويسين جدا برضه و احيانا بيجيبوا مشايخ من السعودية ..

زي مانتو شايفين المحفزات كتيره للي عاوز يقرب من ربنا سبحانه و تعالى

علشان تعمل عمرة ممكن تعملها بري ٥ ايام وماتتكلفش اكتر من ٥٠ دينار ، بس السفر بيبقى مرهق طبعا يوم كامل في الاوتوبيس رايح و يوم جاي .. اما بالطيران ٣ ايام فبتتكلف حوالي ١٥٠ دينار تزيد او تنقص قليلا .. اما بالنسبة للحج بيتكلف في حدود ١٢٠٠ دينار او اكتر على حسب .. 

نيجي للناحية التانية .. الكويت بلد منفتحة طبعا ، انا كنت في الجهرا ودي السيدات عادة بيلبسوا فيها النقاب كعادة في الغالب مش كعبادة ، لكن لو رحت العاصمة مثلا تلاقي انفتاح احيانا ممكن يكون مؤذي بالنسبالك ، مافيش اي قيود .. و طبعا الستات بيسوقوا العربيات عادي مش زي السعودية .. السينمات موجودة و الدنيا مفتوحة ..

كلمتين عن المدارس كده .. ماينفعش تدخل اولادك مدارس حكومي الا اذا كان حد من الابوين شغال في وزارة التربية و التعليم ، مؤخرا و بعد ما انا رجعت بدأوا يدرسوا في العقود الحكومية للاطباء انهم يسمحوا لابناء الاطباء دخول المدارس الحكومية او اعطاؤهم مبلغ من المال عن كل طفل علشان يحسنوا وضع الدكاتره شويه عن باقي الخليج لانهم لقوا ان دكاتره كتير بتمشي ، غير كده عندك المدارس الخاصة و دي ممكن تبقى عادية زي المدارس الباكستاني و دي بتبقى في حدود ٤٠٠ دينار او زياده شويه غير التحابيش اللي حوالين الدراسه سنويا بس التعليم فيها على ماسمعت اي كلام خالص .. شعبي يعني .. توصل بقى للمدارس الانترناشيونال اللي بتوصل مصاريفها لالفين و تلاته في السنه .. يعني لو عندك تلات عيال مثلا عاوز تدخلهم انترناشيونال يبقى عليه العوض و منه العوض في مرتبك .. 

متوسط صرفك كفرد عاوز يحوش مش هيزيد عن ١٠٠ دينار في الشهر ، اضرب في عدد افراد الاسره بقى .. المغريات هنا كتير طبعا و الفسح و الخروجات مكلفة بالذات لو معاك اسرتك ، بس لو عاوز تعيش حياتك هتعيشها .. معظم اللي معاه عيال في مدارس نظيفة بيدور على طريقة يمشي بيها من الكويت و لكن هيهات .. بعد ما اتعودت انت و عيالك على العيشة هناك صعب تقدر تغيرها .. وده السبب الاساسي ان نادرا ماتلاقي حد بيرجع من الكويت مع انها زادت في الفتره الاخيره لان مافيش زياده في مرتبك مع زياده الاسعار و السكن و المدارس  ، ده طبعا لو كنت دكتور .. او كنت شغال انت او مراتك في التربية و التعليم ، اما الباقي فصعب يعيش بصراحة مع اهله .. يعني تلاقي عامل كل مرتبه ١٢٠ دينار شهري مثلا .. ده ممكن يعيش على أده لو لوحده ، بس يقولك اهو احسن من انه يرجع مصر مايلاقيش شغل مثلا .. 

طبعا بعد ما اجرت الشقة و اشتريت العربية بقى ممكن ابعت اجيب اسرتي .. انا جبتهم زيارة ٣ شهور بس نظرا للظروف العامة .. 

علشان تعمل زيارة الموضوع مابياخدش يوم واحد ، تروح تاخد فيه تاشيرة الزيارة و تبعتلهم صورة منها يحجزوا الطيران و ييجوا علطول .. اما اجراءات الاستقدام فتشابه الى حد كبير اجراءات سفرك انت شخصيا و انت جاي .. من كشف طبي لتحاليل لمشاوير القاهرة ، ممكن تاخد شهرين كتوتال علشان تجيب حد استقدام .. زمان كان ممكن تعمل استقدام لوالدك ووالدتك كمان بس لغوا الموضوع ده دلوقتي .. الظروف بتتغير من يوم للتاني .. يعني ممكن مرة تروح تعمل زيارة لحد يقولولك ان الزيارات واقفة دلوقتي بالنسبة للاب و الام مثلا .. ماتفهمش ليه

بصفة عامة ممكن تعمل زيارة لمدة ٣ شهور غير قابلة للتجديد ، و القانون بيقول انك ممكن تعمل زيارة تاني بعدها ب ٦ شهور على الاقل .. بس كل حاجة في الكويت ممكن تمشي بالواسطة .. او حتى من غير واسطة لو الشخص اللي بيخلصلك الورق راجل عاوز يمشيلك الدنيا .. واحيانا لما يعرف انك دكتور يبقى عاوز يخدمك .. وده شائع في المصالح الحكومية

اذكر لما جيت اجدد رخصة العربية قالولي انهم في المرور بيرخموا جامد و لازم يفحصوا العربية كويس و يطلعولك فيها اي حاجة تروح تعملها و ترجعلهم تاني .. اخويا وهوه بيجدد رخصة عربيته قالوله يلمع الفوانيس !! اي بتنجان مخلل .. بس ماحدش كان عارف انه دكتور الحقيقة 

واحد ابن حلال نصحني قاللي وانت رايح خد معاك البالطو حطه في العربية من قدام .. عملت زي ماقال .. فوانيسي ماكانتش عاوزة تتلمع و بس ، دي كانت مكسورة اساسا .. الراجل شاف البالطو سالني انت دكتور ايه قلتله اطفال .. قاللي طب انا عندي مصاريني باحس انها تاعباني علطول ، قلتله اي كلام في اي كلام عن ان المصارين ممكن تتعب من حين لاخر وبالذات المصران الغليظ أو الرفيع وده من طبيعة الأشياء .. الحمدلله عداني من غير اي حاجة ، قاللي بس ابقى صلح الفوانيس يادكتور ، قلتله كله على الله و مشيت .. طبعا بعت العربية قبل ما اجدد تاني و فوانيسها كانت لسه مكسوره !!

الحمدلله الدنيا استقرت اكتر لما الاسرة جت .. وكنت عاوز افسحهم و اوريهم الكويت بقى ، و كان عندي وقت الكافي الحمدلله .. اي نعم الساعة البيولوجية بتاعتي باظت خالص .. عندي كل يومين شفت غير اليومين اللي قبلهم وغير اليومين اللي بعدهم ، فمابقتش عارف بانام امتى و باصحى امتى .. لكن في النهاية انا عندي ٨ ساعات شغل و الباقي فاضي .. الطرق في الكويت سهلة الى حد كبير و خصوصا مع ال GPS ، الطرق معظمها على شكل شوارع  متقاطعة بالطول العرض ، و يكفي انك لو عاوز تروح مكان تبص على الخريطة قبلها تعرف اقرب تقاطع .. يعني مثلا تقاطع الدائري الرابع مع شارع ٥٥ ده قريب من الحراج مثلا وهكذا .. طبعا الجو في الكويت معظم السنة حار جدا و لذلك معظم الخروجات بتبقى في اماكن مغلقة و مكيفة زي المولات الكبيرة .. لكن برضه بتلاقي اماكن مفتوحة و حدائق عامة و الملاهي والاكوابارك و جنينة الحيوانات .. غير شارع الخليج العربي اللي موازي للبحر و بيمر بالشويخ و الكويت و السالمية و مكمل .. شارع نظيف جدا ماشاء الله ، عاوز بحر ؟! عندك الخليج العربي المايه بتاعته جميلة مافيهوش امواج غالبا لو حبيت تنزل الماية .. بصفة عامة هتنبسط هناك باذن الله بس المهم ماتزهقش بعد سنتين من التكرار ..

بالنسبة للتسوق في الكويت ، هيا قائمة اكتر على فترة التخفيضات .. تلاقي الحاجات بقت بنص التمن بل و بربع التمن كمان في فترات معينة في السنة ، و ده بيغريك زيادة انك تشتري حتى لو مش محتاج على فكرة .. تلاقي القميص مثلا ابو ١٠ دينار بقى ب ٣ دينار فترة محددة و بعدين يرجع لسعره الاصلي خلال بقية السنة .. بتلاقي ماركات و حاجات حلوة كتير ..

في محلات اسمها outlet و دي بتبيع موديلات السنة اللي قبلها باسعار ممتازة ، بس اللي يعرف يوصلها ، ساعات برفانات نظارات اي حاجة ، كل حاجة ليها ال outlet بتاعها ..

في سوق الموبايلات الايفون الاكثر انتشارا هناك ، و تلاقي اول مانزل ايفون 6 مثلا كله باع ال 5s بتاعه حتى لو جديد علشان يواكب التطور و كدهون يعني .. شعب مواكب للتطور بطبعه !!

نرجع تاني للشغل .. بفضل الله الشغل كان مريح ، يعني ماكنتش باروح الشغل متضايق و دي حاجة لا تقدر بالمال  في الغربة .. بس طبعا مافيش اي ارتقاء علمي .. الحكومة طبعا فيها system كويس 

كنت دايما باسمع ان المصريين مش كويسين مع بعض في الغربة لكن الكلام ده انا شخصيا ماشفتوش ، الدكاترة اللي معانا كلهم محترمين و قلبهم ابيض و ماحدش حاول يعمل اي مقالب الحمدلله ، سالت في الموضوع ده ذوي الخبرة في السعودية فقالولي ان الامر مختلف شوية لانك في السعودية معرض للاخطار في مهنتنا دي بالذات ، و الشعب السعودي شعب شكاي بطبعه .. فكل الناس بتحاول تسيڤ نفسها و ترمي على اي حد تلاقيه في سكتها ، فبتلاقي الطعنات موجهة ليك حتى من اقرب اصدقاءك كمان .. ودي عامة وجهات نظر و يمكن تكون بتختلف على حسب المكان وطباع الناس وانت ونصيبك بقى والله اعلم ..

ربنا كرمنا بدكتورين جداد مصريين ، الحمدلله مابقيتش الجونيور هنا .. ايه ده بس دكاترة جداد ليه ؟! 

عدد المسجلين كويس جدا و ماعندناش نقص و لا عجز مثلا و لا حاجة .. 

عامة انتهزت الفرصة و عملت فيها دور العالم ببواطن الامور و قعدت انصحهم .. ياجماعة ماتقلقوش ده مجرد انترفيو مش اكتر ، و لازم تبقوا هاديين و مبتسمين في اللجنة و تحسسوهم انكم مش عارف ايه و كلام زي ده كتير .. طبعا هما مروا بنفس التجربة اللي انا مريت بيها .. قلق و كده ، عامة من خبرتي الضئيلة جدا الواحد بيبقى عاوز حد يهديه و يحسسه ان الدنيا سهلة و بيس ، لو سقط بعد كده بقى يبقى يتعامل مع الامر الواقع انما مافيش داعي تقلقه خاصة في بداية التجربة .. اديتهم عصارة خبرة السنين في كبسولة ، هما ما استنوش كتير بصراحة ، يادوبك اسبوع و الامتحان اتحدد .. ولجنتهم برضه ما كانتش نفس اللجنة بتاعتنا بل كان فيها (وياللعجب) دكتورة مصرية كمان !! خلاصة القول ان واحد فيهم عدى و التاني ما وُفقش .. والتاني ده هوه اللي قولتلكم عليه انه رجع مصر و جه الكويت تاني امتحن تاني بعد ٣ شهور تقريبا على مستشفى تانية و وعدى وفضل شغال فيها لحد ما مشيت انا ..

المهم دلوقتي ان احنا معانا طبيب جديد الا و هو الدكتور خالد .. اكبر مني بدفعة و قضى سنة في مستشفى خاصة في جدة و بعديها جه على هنا ، محترم و حبوب برضه .. 

اخدت منه خبرته عن جده ، و ايه اللي ماعجبوش هناك و الميزات و العيوب وكده .. عامة كل واحد بيبقاله اولويات في حياته بيقرر على اساسها المكان ده مناسب و للا لا .. العيوب اللي هوه قالهالي ماتعتبرش عيوب خالص بالنسبالي ولكن هوه كان شايفها كده ..

الخلاصة ان العدد بقى في الليمون و بقى في اتنين قاعدين في الطوارئ طول اليوم .. اللي اساسا ممكن نص واحد يشيلها منفردا لو صحته كويسه ، و اتنين في الحضانة و برضه واحد بس ممكن يشيلها بسهولة .. 

شوية و لقينا استشارية جديدة جاية كمان .. ايه الزحمة دي يا اخواننا .. الاستشاري عندنا شغله اسخف الصراحة من شغلنا .. اولا ٤ ايام split shift .. من ٩-١ ثم من ٥-٩ ، عندهم يوم من ٤-١٢ و يوم من ١-٩ .. طبعا ده كان في الاول قبل ما يتناقصوا .. غير انهم بيفضلوا on call باقي اليوم ، وممكن يتصلوا بيهم في اي وقت لحضور ولادة قيصرية فيها مشاكل مثلا او اذا حالة حصلها حاجة لازم يكونوا متواجدين فورا .. احنا بالنسبالنا دماغنا بتفضى اول ما ال ٨ ساعات بتوعك يخلصوا .. هما بقى بيشيلوا هم الحالات حتى و هم في البيت .. غير ان شفت ال split ده بياكل اليوم و مابيبقاش عنده وقت للخروج اد كده .. عامة اكيد في ناس مابتحبش تاخد الساعات متواصلة نظرا للارهاق بتاعها .

مافيش كلمه ضربت ودانك هنا ؟! .. يعني ايه تناقصوا ؟؟

اه تناقصوا في العدد ، الدكتورة الاستشارية الجديدة كانت استاذة في طب الزقازيق ، و ماكانش ليها تقل على موضوع ال on call ده .. في مرة حالة تبعها تدهورت بعد الفجر و قعدت اتصل بيها ماردتش عليا و الحالة توفاها الله .. و الاهل راحوا اشتكوا ، وراحت القسم علشان المحضر ، طبعا ماحصلهاش حاجة بس هيا حست انها اتبهدلت على كبر و ما استحملتش فقدمت استقالتها .. باقرا احد الجرايد الكويتية مره لقيت ليها مقالة فيه ، ماقدرتش افهم الصراحة هيا اشتغلت ايه بعد ما سابتنا !!!

مره تانية جاي الشفت في منتهى الانشكاح ، و اذ بي أفاجأ ان الدكتور محمد الاختصاصي اللي جاي معايا في نفس الوقت حصله termination ، ياساتر يارب .. وقع عليا الخبر وقعة البطاطس في الزيت المغلي .. ده لسه مابقالوش ٣ شهور ، مراته وولاده لسه جايين 😣 ، خير ايه اللي حصل ؟! .. حالة في الحضانة حصل فيها pneumothorax و امكانيات المستشفى ماكانتش تسمح بعلاجه للاسف و دي حاجة ماساوية الصراحة ، فالراجل اصر ان الحالة تتحول الحكومة قبل ماتواجه مصيرها المحتوم .. لا البنات متعودين على المشاكل الكبيرة و لا في chest tube بالحجم ده ، و على ما وصلت مستشفى الجهراء ١٠ دقايق وماتت .. بس هوه الصراحة ماقصرش مع الحالة نهائيا .. بالعكس اشتغل بالامكانيات الموجودة لحد ما الاسعاف اتجهزت .. المشكلة ان الدكاترة في الحكومة ماسكتوش و اشتكوا المستشفى اللي بتبعتلهم حالات تموت عندهم ، طبعا لو حققوا مع الدكتور محمد هيفتحوا النار على المستشفى ، ازاي تبقى فاتح حضانة و مايبقاش عندك كل الامكانيات لعلاج الحالات الطارئة ، ومش بعيد تعمل مشاكل لصاحب المستشفى ، غير طبعا سمعته .. قام ناهي عقد الدكتور محمد فورا !! 

لاحول و لاقوة الا بالله .. زعلت جدا بصراحة و اكتأبت فترة ، لاحظوا ان الدكتور محمد جه معايا في نفس الوقت و انا اكتر واحد مرتبط بيه ، غير اني حسيت بالغدر من الطرف الاخر ، و ده معناه ان انا شخصيا معرض للغدر في اي لحظة .. 

اسبوعين بالزبط و الدكتور محمد لقى شغل في مستشفى تانية لعلها تكون افضل بالنسباله باذن الله .. تواصلت معاه فترة بعدها هوه كان كويس الحمدلله و مستقر فيها ..

اقول بالمناسبة دي بقى اني قبل ما امشي بتلات شهور و للا حاجة لقينا تلات دكاترة جايين جداد و لسه بيخلصوا في اجراءاتهم ، و فجأة سمعنا خبر مزلزل .. حصل termination لاربع دكاترة اطفال مره واحده و من غير اي اسباب واضحة .. التلات دكاترة الاردنيين و الدكتورة البلغارية !!! 

و بعدين بقى في الليلة اللي مش فايتة دي ؟! ايه اللي بيحصل في المستشفى يا اخوانا ؟! مافيش سبب واحد مقنع قدر يقنعني من الاسباب التخمينية اللي كل واحد بيقولها ، لان لو المشكلة مثلا انهم مش بيشتغلوا حضانة ، طب ماهوه عارف من البداية ، كبار في السن و عاوز شباب .. برضه عارف من البداية .. وماحدش فيهم عمل اي مشاكل محسوسة ، كده الواحد يقلق على نفسه بقى ماحدش مآمن على نفسه ، و للاسف مكتوب النقطة دي في العقد لو كنتم فاكرين .. يجوز للطرف الاول اعفاء الطرف التاني من العمل خلال اسبوعين وبدون ابداء اسباب ، اذن هوه عامل حسابه على الموضوع ده من زمان .. ايه اللي في دماغه الله اعلم ، بس طبعا الكل كان حاسس انه ممكن يتغدر فيه في اي لحظة ..

كل الدكاترة اللي مشيوا اشتغلوا برضه اللي في مستوصفات و اللي في مستشفيات مجاورة و غير مجاورة ، الموضوع simple جدا ومافيهوش اي مشاكل ، تخصص الاطفال مطلوب و المستشفيات بتحب اللي ورقه خلصان و معاه الترخيص لانه مش هيتعبهم و لا هيكلفهم مبالغ اضافية .. 

علشان تجدد ترخيص مزاولة المهنة و اللي مدته سنتين فقط لازم تاخد عدد ساعات معتمده من المؤتمرات المقامة في الكويت ، انا مش فاكر كام ساعة بالزبط تقريبا ٤٠ ساعة و اللي في الكويت يصححلي .. ودول عامة ممكن شركات الادوية يجيبوهملك لو انت مزبط مع حد ، انا ماشفتش غير مؤتمر واحد في السنة اللي انا رحتها بس كان محترم عليه حوالي ٢٠ ساعة ..

يتبع باذن الله ..

-----------------------------

-----------------------------

ذكريات الكويت (العاشرة والأخيرة)

طبتم احبائي .. 

وصلنا للحلقة الاخيرة اخيرا ، هتستريحوا مني خلاص ماتقلقوش ، تشرفت بمعرفتكم كثيرا و اسال الله اني كنت ضيفا خفيفا و ان تكونوا قد استفدتم ولو القليل مما كتبت ..

بالنسبة للخبرات المختلفة ، انا لا ازعم اني عارف كل حاجة عن الكويت .. انا كل خبرتي اقل من سنة ، و دي خبرتي الشخصية ، ممكن تختلف طبعا من مكان لمكان و اكيد في ناس عندهم خبرات اكتر مني بكتير ، لكن ده اللي انا قدرت عليه بقى .. و سامحوني اذا كان في معلومات منتقصة او غير دقيقة بس والله انا تحريت الدقة على قد ما قدرت ..

نستكمل بقى القصة ..

زي ما قلتلكم ، استقبلت اسرتي مدة قصيرة لا تتجاوز الثلاث شهور .. وودعتهم على امل اللقاء بهم قريبا  ..

وتمر الايام بعدها زي بعض ، مافيش جديد بتروح الشغل ٨ ساعات و باقي اليوم يا اما تحاول تقرا شوية في الطب او غيره ، كنت عاوز ادخل جزء من الزمالة البريطانية بس ربنا ماوفقنيش للاسف ..

وزني زاد جدا طبعا من القعدة فلقيت ان عندي فرصة كويسة ممكن ما الاقيهاش تاني في مصر .. اني اخس ..

لقيت جنب البيت جيم ، واسمه هناك (معهد صحي) ، كان نظامه ظريف .. بتشترك ٣ شهور بمبلغ ٥٠ دينار ، بيفتح من ٧ الصبح لحد ٤ بعد منتصف الليل .. اي وقت ممكن تروح انشالله تقعد اليوم كله في الجيم .. طبعا الجيمات هناك غير شكل ، حمام سباحة كبير و صالة سويدي و اجهزة كتير ، غير حمام البخار و الساونا اللي عمري ماكنت عارف الفرق مابينهم غير لما رحت .. بلياردو كمان متاح  وواي فاي و عيشة ، ده غير انهم بيشغلوا bein sport و كل جهاز مشي قدامه تليفزيون خاص بيه بسماعات في الودان ، يعني حاجة اخر حيلاوة .. كنت باروح يوميا اقعد ساعتين تلاته .. مع شوية تزبيط في الاكل خسيت اكتر من ١٢ كيلو في التلات شهور اللي اشتركت فيهم .. و اللي هما كنت زدتهم خلال السنة ، و اللي تقريبا رجعتهم تاني دلوقتي بعد ما رجعت مصر !!

بالنسبة للشغل ماكانش فيه جديد ، دكتور مصطفى المقدم طبيب مسجل اطفال جديد اول مره يسافر كان جاي من اسيوط دفعتي ٢٠٠٥ ، امتحن ونجح بفضل الله ، كان عزباوي زي حالاتي لسه على بال ما زوجته و ولاده ييجوا باذن الله ، لضمت معاه و بقيت رايح جاي اخده في سكتي ، كان معجب اوي بمعرفتي للطرق بالعربية مع اني ماقعدتش كتير .. انت فظيع ياحسان ، عارف كل حاجة ياحسان .. جامد جدي ياحسان .. دي الجمل اللي كان بيثبتني بيها دايما .. كنت قلقان منه الصراحة وحاسس اني ممكن يحصلي arrest في اي لحظة بس ربنا ستر 😵 وطلع ابن حلال ، الطرق سهلة جدا لو ركزت شوية مش حوار يعني .

جالنا كمان دكتورتين جداد كانوا لسه مستنيين الامتحان مصرية من اسيوط و سورية ارمينية ، كلهم محترمين الصراحة ، نجحوا قبل ما امشي بكام يوم كده ..

وجاء اليوم الموعود اللي المفروض اقدم فيه استقالتي .. لازم تقدم استقالتك طبعا قبل نهاية العقد بثلاث شهور .. قالولي الموضوع مش مقفل اوي و ممكن تتاخر شوية في تقديم الاستقالة .. بس اهم حاجة صاحب العمل يوافق و هوه بيوافق عادة ، في ناس مشيت من المستشفى و راحوا مستشفيات تانية قدموا استقالتهم قبل اقل من شهر و الدنيا مشيت عادي ..

انا كنت من الاول عاوز اقعد سنة واحدة و ارجع مصر .. طبعا المكان مريح جدا لواحد عاوز يستريح .. ولو مافيش القلق بتاع ال termination ده كنا ممكن نقول ان المكان ممتاز من حيث الراحة ، كل الناس قبل ما اسافر قالولي استحالة ارجع ، و تحدي ، خصوصا مع ظروف البلد اليومين دول .. 

ماحدش بيروح الكويت يابني و يرجع .. قالهالي الاستشاري بتاع الحضانة بتاعتنا في بنها التخصصي .. 

تفكير و استخارة و استشارة و شعور و احاسيس و حوارات ، وفي النهاية استقريت على تقديم الاستقالة .. ماحدش كان مصدقني و كل ما اقول اني هاستقيل الاقي الناس بتضحك و يقولولي الجملة الخالدة (ماتقداااااارش) !! 

كتبت الاستقالة و قدمتها لرئيس القسم قاللي ليه بس كده ؟! .. قلتله والله الظروف كانت اقوى مني و كلام كتير مالوش لازمة كده .. نظام فاروق الفيشاوي في فيلم (ياريتني قعدت كمان شوية) ، المهم رئيس القسم قاللي اروح للدكتور منصور صاحب المستشفى علشان هوه المنوط بالموضوع ده و مش عارف ايه ..

رحت للدكتور منصور السكرتيرة قالتلي هابلغه ، و بعدين بعتتلي قالتلي الدكتور منصور بيقولك الموضوع ده مع مدير المستشفى ، رحت للمدير الطبي قاللي و انا مالي انا بالموضوع ده ، روح لرئيس القسم !! في ايه ياجدعان ؟! انا عمال اتشقلط كده ليه ماترسونا على بر .. رحت لرئيس القسم تاني ، ماهو يانا يا هما بقى .. قاللي ان الدكتور منصور كلمه و سأله احمد عاوز يستقيل ليه ؟ حد مزعله و للا حاجة ، يشكر الراجل سال عليا و حسيت من كلام رئيس القسم انه باقي عليا شوية .. 

ماعلينا .. المهم انه اخد مني الاستقاله .. كده انا باقيلي شهرين على ما ارجع غير الشهر الاجازة ، و قدامي اخلص اوراقي و حساباتي ، و ابيع العفش و العربية .. 

انسب وسيلة علشان تبيع العفش ان حد ياجر الشقة بعدك بعفشها .. و انسب واحد وظروفه متزبطة عليا هوه دكتور مصطفى خصوصا انه هيبقى عدى عليه ٣ شهور تقريبا اللي هما مسموح له بيهم في السكن المؤقت ، غير انه لسه مالوش في السواقه اوي ، قلت ألبسه في الشقة و العربية سوا و ابقى انا كسبان و هوه كسبان ، في الاول رفض وقالي انه عاوز حاجة احسن و في مكان احسن و عربية احسن و عفش احسن ومش عارف ايه كمان احسن ، قلتله يفكر كويس ، انا شايف الظروف مناسبة ليه جدا كبداية حتى ، و بعد كده لو عاوز يوسع على نفسه فالامر متاح ، بس هوه كان لسه جاي و ظروفه متلخبطة فوعدني انه يفكر ..

علشان تبيع العفش ممكن تتصل بشركات شغالة في الموضوع ده ، تجيلك تاخد منك العفش كله بس اكتشفت انهم بيبخسوا الحاجة حقها بشكل سخيف الصراحة وعن تجربة ناس كتير .. يعني ييجي يقولك هاخد منك العفش كله ب ٦٠ دينار مثلا .. لازم ألبس مصطفى في الشقة ضروري 😈

عامة مصطفى قعد اسبوعين يفكر و للا حاجة و بعدين وافق الحمدلله ..

خلصنا من حاجة كده ، فاضللي العربية ، دوختني العربية دي بصراحة .. حطيت اعلان على النت ، يادوب تحط الاعلان (انسب موقعين لقيتهم هما السوق المفتوح و الدوبيزل) تلاقي على الاقل ٢٠ واحد اتصل بيك و قعد يفاصل معاك في التليفون و ماحدش بييجي في الاخر ..

المشكلة اللي اكتشفتها ان العربية الياريس نزل منها الموديل الجديد ٢٠١٥ و دي مختلفة في الشكل خالص ، و ده بيقلل سعر العربية جدا ، للاسف كل الناس كانت بتعرض عليا مبالغ قليله اوي ، انا شاريها ب ١٥٠٠ و قالولي تنزل ٢٠٠ دينار في السنة ، الاقي الناس بتقولي ٨٠٠ و كلام زي كده ، في الاول قلت لا اتمسك بال ١٣٠٠ و بعدين لقيت الموضوع مش نافع و هالبس فيها .. بعتها قبل ما اسافر باسبوعين ب ١٠٠٠ دينار بالعافية ، مش كنت جبت حاجة شديدة بقى مادام كده كده خسرت ٥٠٠ دينار في مافيش هما ٨ شهور مش اكتر ؟! يللا حصل خير بقى نصيبي كده ..

اخر شهر لقيت مصطفى قاعد وحيد و انا وحيد جه في دماغي نلم الشمل و كده ، انا ما قعدتش مع حد قبل كده في نفس السكن بس مصطفى شكله ابن حلال و كيميته ماشية مع كيميتي (كيميته دي المصدر بتاع كيمياء) .. اتفقت مع الحارس بتاع العمارة اللي انا فيها اني هانقل و عندي واحد هياخد الشقة بعدي ، قاللي هاكلم صاحب الملك ، يومين كده و رجع قاللي لا الراجل عاوز ٢٥٠ ، قعدت افاصل معاه وكده لحد ما وصلنا ل ٢٤٠ ، عرضت الموضوع تاني ع مصطفى لاني كنت قايله نفس السعر اللي انا كنت واخد بيه ، طبعا اتصدم لحظة ووافق في اللحظة اللي بعدها علطول ، المكان مناسب جدا لظروفه ، عرضت عليه يقعد معايا الشهر اللي فاضل تسليم و تسلم لو حابب ونقسم الايجار فوافق .. 

باقي تسوية الحسابات ، طبعا التعامل في الكويت بكارت ال ATM في كل المعاملات المادية و نادرا ما بتحتاج يبقى معاك فلوس في جيبك ، حتى محطة البنزين تلاقي فيها الجهاز بتاع ال ATM ، بتشترك في البنك في خدمة الرسائل و اي مبلغ اكتر من ١٠ دينار تتسحب من رصيدك في اي مكان تلاقي جايلك رسالة بالمبلغ المسحوب ، وطبعا المرتب بيجيلك على هيئة رسالة يوم ٢٦ في الشهر و للا حاجة .. العملة لسة متغيرة في الشكل في شهر ٦ اللي فات .. ماكنتش تلاقي على العملة القديمة حاجة مفيدة مرسومة على العملة و اللي المفروض بتدل على تراث البلد .. تلاقي الربع دينار القديم مرسوم عليه عيال بتلعب بالبلي ، مش فاهم تراث البلد اللي مرتبط بالبلي ده !! بس العملة الجديدة كويسة و مرسوم عليها حاجات كويسة زي ابراج الكويت المميزة و اللي لازم تتصور معاها و تحطها صورة بروفايلك لفترة و انت هناك .. و مرسوم حاجات تانية زي برج التحرير و المسجد الكبير و اللذي منه ..

عاوز تسحب فلوس علشان الايجار مثلا بتسحب بالماكينة اللي موجودة في اي مكان ، غير ان في خدمة الايداع بالماكينة كمان موجودة في مكن كتير .. تحط الفلوس في المكنة تلاقيها بتعد الفلوس الاول و بعدين تقولك ان المبلغ كذا ، لو صح بتكمل العملية و لو في غلطه وللا حاجة ممكن تكنسل العملية .. انا دخلت الفلوس بالمكنة لما بعت العربية و العفش .. الصراحة كنت قلقان ، طب افرض الفلوس دخلت و ماطلعتش اعمل ايه انا ؟! مش هاعرف امسك في زمارة المكنة مثلا .. بس الموضوع مثير و يستاهل التجربة ، الحمدلله جاتلي رسالة بالمبلغ في ساعتها ..

المهم نزلت الادارة بتاعة المستشفى اخر شهر و قلتلهم انا المفروض ليا مرتب شهر مدفوع الاجر و عاوز احجز الطيارة ، قالولي بالنسبة للطيارة تقدر تحجزها و تجيبلنا الفاتورة و تستردها في اي وقت .. اما بالنسبة لمرتب الشهر الاخير فده مش هتاخده غير لما تمضي في الشئون على الغاء الكفالة .. لما رحت امضي لقيت الورقة مكتوب فيها اتعهد انا فلان الفلاني اني قبضت كل مستحقاتي ، ايه النظام ؟ امضي وللا ايه ده انا لسه فاضللي شهرين ماقبضتهمش .. المهم خليتها على الله و مضيت و ربنا سترها الحمدلله .. مرتب الشهر الاجازة طلعلي بعديها بشيك صرفته من بنك و حولت فلوسه على البنك بتاعي علطول .. علشان تحول فلوس على مصر بقى ، يفضل تغيرها لدولار و تحولها على حساب جاري في مصر ، قالولي ان البنوك الحكومية ممكن تعمل معاك الدنيئة و تديلك الفلوس بالمصري بسعر البنك لو جيت تسحب دولار ، انا كان حسابي في بنك فيصل فماعملش معايا اي مشاكل بس طبعا مش هتقدر تسحب اكتر من ١٠٠٠٠ دولار في اليوم .. رحت شركة صرافة و بال ATM سحبت كل الفلوس من البنك و حولتها دولارات في ساعتها و حولتها على حساب بنك فيصل بمبلغ بسيط ، حوالي ٢ دينار بس ، قاللي قدامها اقل من اسبوع و توصل باذن الله .. كنت قلقان برضك ، طب افرض رجعت مصر و مالقيتش حاجة وصلت .. اخذت نمرة الراجل بتاع الصرافة و اديتها لاخويا قبل ما امشي و قلتله لو حصل مشاكل هاخليه يتصل بيك ، والحمد لله ماحصلش حاجة .. ممكن كمان تحول فلوسك كلها لشيك و تاخده معاك تصرفه من مصر بس بياخدوا عالدولارات مبلغ مش فاكر اد ايه ..

انا كده خلصت الحكاية اقول شوية نقط بسيطة عالهامش في كده من قبيل الثرثرة مش اكتر ..

شركات الادوية هناك كانت بتعمل meetings أو eatings (لو اردنا الدقة في اللفظ) بكثرة ، كان عندنا دكتور اختصاصي بيزبط مع الشركات و بنروح اي فندق فخيم يقولولنا كلمتين عن ال product بتاعهم و نتغدى في الغالب open بوفيه و نتفسح ، وربنا يقدرنا على فعل الخير .. في شركات طبعا بتبقى عامله invitations لمؤتمرات عالمية اشي دبي على لندن على تركيا و انت و نصيبك ، انا شخصيا نابني يومين في دبي تبع شركة نستله راحوا لرئيس القسم اعتذرلهم و لقيته بيكلمني بيقوللي لو فاضي تعالالي كالعاده .. و ربنا يسرلي بس اتخصم مني يومين المؤتمر بدون اجر ..

المستشفى بتعمل كامب سنوي في بداية الربيع بيبقى عائلي و ظريف في البر اللي هوه فسحة الكوايته الاساسية في الاجواء الكويسة .. تلاقي كل واحد عامله كام خيمة في الصحراء كده و يروح يقعد كام يوم في البر ، مش عارف ايه المتعة في كده بس هيا دي العاده هناك .. يا اما يسافروا في الاجازات بره الكويت و ده كتير جدا .. تلاقي البلد فاضية خالص في الاعياد لكثرة السفر .. 

كتير من الكوايتة حريص على الفلوس الصراحة ، مش زي ماكنت متصور انهم معاهم فلوس كتير وبيصرفوا براحتهم ، لا تلاقيهم برضه بيفاصلوا جامد و بيحاولوا يستنصحوا كتير .. طبعا مش كلهم بس ده الطابع الغالب على حسب ماشفت يعني ..

قالولي ماتنساش تعمل شهادة خبرة و توثقها علشان لو عاوز تشتغل في حته تانية بيبقوا عاوزين شهادة خبرة متصلة في نفس المجال .. طلبتها خلصوهالي في الادارة وختموها من ادارة الشئون الصحيه هناك و انا وثقتها من الخارجية الكويتية بعدها ..

عندهم في الكويت حاجة زي الخماسين كده اسمها (طوز) بس اشد لدرجة انك ممكن ماتشوفش وانت سايق من كتر العفرة .. اوعى تنزل و تسيب الشبابيك مفتوحة زي العبدلله لما رجع و قعد يشيل اكوام التراب من فوق الغسالة ..

المقاولين العرب عاملة معظم الطرق في الكويت و ينتشر اللون الاسود و الاصفر المميز على جوانب الطرق و الكباري الجديدة .. وزي مابيقولوا ، الفرق بين الكويت و الامارات ان الامارات جابت اجانب عملوا البلد بينما الكويت جابت مصريين !!

بالنسبة للمرور ، الكويت فيها زحمة مرورية لا باس بيها خصوصا اوقات الذروة ، التخطيط سيء للاسف .. تلاقي حواليك مئات الافدنة من الفضاء و الشارع صغير و زحمة خانقة .. 

لو لاقدر الله وعملت حادثة بالعربية بتقف زي مانت بالضبط بغض النظر عن الطريق ، لحد ما ييجي بتوع المرور و يعملوا محضر و يتحقق فيه بس خدلك ٣ ساعات و للا اربعة ، و في الاخر لو انت مش غلطان .. التامين بيتحمل اخطاء الغير و يصلحلك عربيتك في حدود معينة ، اما لو انت اللي غلطان فانت بتتحمل تصليح عربيتك و التامين بيتحمل تصليح الطرف المتضرر ..

ليك تامين صحي في الحكومة ، بدينار واحد تروح تكشف و تاخد الادوية الحكومية ، بس بتاعة المصريين مش بتاعة الكوايتة ..

متوسط الحلاقة هناك دينار و نص الى ٢ دينار .. مصريين و هنود و باكستانيين غالبا ، طبعا احسن حاجة تحلق عند واحد باكستاني لا يدوشك و لا يقعد يكلمك عن ازاي انه مش قادر يعيش في البلد بنت اللذينا دي و انه كان فاتح في المحلة الكبرى و الأشيا كانت معدن غيرش هوه بس الظروف هيا اللي حكمت عليه بكده و اشياء من هذا القبيل ..

مافيش غاز طبيعي في الكويت و الاعتماد التام على انابيب البوتجاز ، بس الانابيب الجديدة مصنوعة من ماده خفيفة جدا و بتبقى خف الريشة و هيا فاضية .. ممكن تجيب الانبوبة ب ١١ دينار و لو عزت ترجعها في اي وقت و تاخد فلوسك بالايصال ممكن حتى لو بعد سنين ، سعر الانبوبة في المخزن ٧٥٠ فلس ثابتة لا تتغير ..

الكوايتة بيحبوا الاجازات اوي و بيحبوا كمان يضموها على بعض ، كده كده الجمعة و السبت اجازة .. تلاقي مثلا طلع العيد يوم اربع .. اجازة العيد اسبوع لحد التلات اللي بعده يقوموا ضامين الاربع و الخميس كمان للاجازة علشان تبقى ١١ يوم مثلا و هكذا ..

الكويت فيها العيد القومي عيد تحرير الكويت اسمه هلا فبراير اسبوع اجازة في اخر شهر فبراير ، اكيد بينضمله ايام طبعا ، بتلاقي العيال كلها لابسة لبس بالوان علم الكويت و ينزلوا الشوارع يرشوا ماية بمسدسات مايه ، لا مسدسات ايه .. بمدافع ماية عملاقة على اللي رايح و اللي جاي ، اياك تفتح شباك عربيتك لحسن انت حر ، انا حذرتك و عملت اللي عليا ..

لو عربيتك حصل فيها حاجة لا قدر الله في منطقة اسمها السكراب عاملة زي التشليح كده فيها قطع الغيار من العربيات اللي عاملة حوادث ، ممكن تروح هناك تاخد قطع الغيار باسعار ارخص بكتير ، هيا كانت في منطقة قريبة اسمها (أمغرة) و نفوها في الصحراء بعيييييد كده في حتة لافيها ماية و لا اي خدمات علشان يعمروا حواليها .. يقال ان أمغرة دي كانت محدوفة في البداية و الامتداد العمراني وصلها بعد عشرات السنين ..

الكويت العاصمة تتجه الى ان تكون مباني ادارية فقط ، و يوجد بعض ناطحات سحاب ، كلها مباني ادارية ، بس طبعا لا تضاهى بدبي مثلا .. 

اكيد طبعا في حاجات كتير ناسيها و لكن انا حاولت بقدر المستطاع اني الم و ادي فكرة كويسة عن دولة الكويت .. بصفة عامة من جهة و بصفتي طبيب من جهة اخرى .. و سامحوني ان كان هناك تقصير .. و انا مستعد اجاوب على اي استفسار من اي حد سواء على العام او الخاص في اي وقت في حدود معرفتي المتواضعة .. 

اخيرا ها انا ذا في الطائرة عائد الى مسقط رأسي لاستكمال برنامج الزمالة المصرية .. بعد تجربة سفر استمرت ٣٣٧ يوم .. هل كتب الله لي العودة الى الكويت مرة اخرى في يوم ما ؟! هل كتب الله لي السفر الى مكان اخر ؟ ام انني سوف اقضي ماتبقى من عمري في مصر المحروسة .. هل ممكن اكتب مرة تانية عن تجربتي في بلاد البورا بورا مثلا ؟!! هذا ما ستبينه الايام القادمة ..

تمت